Zyrtarizohet në Davos “Bordi i Paqes”, Trump: Kërcënimet globale janë ulur

Është zyrtarizuar në samitin e Davosit propozimi i presidentit të Shteteve të Bashkuara të Amerikës, Donald Trump për krijimin e të ashtuquajturit “Bordi i Paqes”.

Në një ceremoni ku morën pjesë në nënshkrim disa nga vendet që kanë pranuar të jenë pjesë e këtij organizmi të ri, kreu i Shtëpisë së Bardhë, Donald Trump u shpreh se që prej marrjes së detyrës së tij ka ndaluar 8 luftëra, teksa shtoi se kërcënimet globale janë ulur ndjeshëm.

“Kjo është një ditë shumë emocionuese, e përgatitur prej kohësh. Të gjithë duan të jenë pjesë e Bordit të Paqes. Ne do të bashkëpunojmë me shumë të tjerë, përfshirë Kombet e Bashkuara. Kemi zgjidhur tetë luftëra dhe besoj se një tjetër do të vijë shumë shpejt. Mendoja se do të ishte më e lehta, por doli më e vështira", u shpreh Trump duke iu referuar luftës në Ukrainë.

Pasi renditi arritjet e administratës së tij në skenën globale Donald Trump reagoi dhe për Venezuelën.

"Në fillim të këtij muaji, falë aftësive, fuqisë dhe fuqisë së pakrahasueshme të ushtrisë amerikane, ne kemi ushtrinë më të fuqishme në botë deri më tani, kapëm diktatorin e jashtëligjshëm Nicolas Maduro dhe popullin e Venezuelës. Jam shumë i lumtur për këtë dhe kemi marrëdhënie të shkëlqyera me udhëheqësit e rinj të Venezuelës. Po e hapim vendin për kompanitë tona gjigante të naftës dhe po shkon shumë mirë. Tashmë kemi nxjerrë 50 milionë fuçi naftë dhe një pjesë e madhe do të kthehet në Venezuelë", u shpreh Trump.

Midis presidentëve që ishin të pranishëm në ceremoninë e nënshkrimit ishin ai Azerbajxhanit, Argjentinës, Kazakistanit Indonezisë, si dhe kryeministri hungarez Viktor Orban. Po ashtu mes firmëtarëve ishte dhe presidentja e Kosovës Vjosa Osmani.

Në Bordin e Paqes do të jetë edhe Shqipëria e cila ka marrë një ftesë zyrtare nga Presidenti Donald Trump.

Trump deklaroi një ditë më parë në Forumin Ekonomik Botëror në Zvicër se edhe presidenti rus Vladimir Putin kishte pranuar ftesën për t’u bashkuar, por Kremlini reagoi duke thënë se Rusia po e shqyrton ende ftesën. Putin tha se vendi i tij është i gatshëm të kontribuojë me 1 miliard dollarë nga asetet e ngrira ruse dhe se e sheh bordin si të rëndësishëm kryesisht për Lindjen e Mesme.

Fillimisht, Bordi i Paqes u pa si një mekanizëm për t’i dhënë fund luftës në Gaza dhe për të mbikëqyrur rindërtimin. Megjithatë, statuti i propozuar nuk e përmend shprehimisht territorin palestinez dhe ka ngjallur shqetësime se mund të zëvendësojë funksione të Kombeve të Bashkuara.

Shtëpia e Bardhë ka emëruar tashmë bordin ekzekutiv themelues, ku përfshihen Marco Rubio, Jared Kushner, Steve Witkoff dhe ish-kryeministri britanik Tony Blair. Izraeli ka shprehur kundërshtime për disa nga emërimet dhe për përfshirjen e Turqisë dhe Katarit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)