Kryebashkiaku i Crans-Montana: Lokali ku shpërtheu zjarri, 5 vjet pa kontroll sigurie

Kryetari i bashkisë së Crans-Montana, Nicolas Feraud, ka pranuar se lokali “Constellation”, ku gjatë natës së Vitit të Ri shpërtheu një zjarr fatal, nuk kishte kaluar asnjë kontroll sigurie nga viti 2020 deri në vitin 2025. Zjarri i 31 dhjetorit shkaktoi 40 viktima dhe 116 të plagosur. Të gjithë ishin të rinj që po festonin.

“Na vjen thellësisht keq, nuk kam shpjegim pse nuk u kryen inspektimet”, deklaroi kryebashkiaku i lokalitetit zviceran, duke shtuar se “përdorimi i fishekzjarrëve në ambiente të mbyllura do të ndalohet”.

Sipas autoriteteve, panelet izoluese të zërit në tavan nuk ishin testuar për siguri kundër zjarrit. Hetimi po përqendrohet edhe në mirëmbajtjen e pajisjeve kundër zjarrit, ndërsa gjykatat do të vendosin për përgjegjësitë penale.

Dyshohet se flakët nisën në një sallë në bodrum, pasi fishekzjarrë të vendosur në shishe shampanje u afruan shumë pranë tavanit të veshur me material të ndezshëm. Prokuroria zvicerane ka nisur hetim penal ndaj pronarëve të lokalit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)