Arrestohen “magjistarët” e vjedhjeve, 100 goditje brenda vitit

Policia në Itali goditi një organizatë të strukturuar kriminale, e njohur si “banda e 38-ës”. Emri lidhet me numrin e pjesëtarëve dhe ata janë të dyshuar për vjedhje në banesa e biznese, mashtrime dhe riciklim mallrash të vjedhura. Sipas hetimeve, grupi kishte realizuar 100 vjedhje në harkun e një viti.

Bëhet fjalë për periudhën nga qershori 2023, deri në tetor 2024. Hajdutët vepronin në të pesta provincat e Kampania-s, si edhe në provincat e Frosinone-s dhe Romë-s. Në mesin e të arrestuarve ndodhet edhe “padroni” i organizatës, i konsideruar si drejtuesi kryesor i aktivitetit kriminal.

Foto: Policia e Napolit

Hetimet nisën pas vjedhjes së një banese dhe zbuluan ekzistencën e shtatë grupeve kriminale, kryesisht me bazë familjare. Sipas Karabinierëve, bëhej fjalë për banda që vepronin me metoda të sofistikuara, që shpesh përdoronin edhe fantazinë. Autorët përdornin çelësa universalë dhe të modifikuar, me të cilët hapnin thuajse çdo lloj dere.

Gjatë vjedhjeve, ata mbështeteshin nga dy apo tre vrojtues të vendosur jashtë banesave, të cilët kishin për detyrë të sinjalizonin rrezikun. Në disa raste, kasafortat hiqeshin nga muret me mjete prerëse dhe transportoheshin për tu hapur jashtë apartamenteve.

Foto: Policia e Napolit

Përveç vjedhjeve në banesa, banda ishte e specializuar edhe në mashtrimin e të moshuarve. Duke përfituar nga gjendja e tyre e pafavorshme, ata i përvetësonin paratë dhe sendet me vlerë përmes mashtrimeve dhe preteksteve të ndryshme. Madje, në disa raste, anëtarët e bandës maskoheshin si shpërndarës të ushqimit në shtëpi për kompani të njohura.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)