Groenlanda, letër e Trump për kryeministrin e Norvegjisë: Nuk do të mendoj më vetëm për paqen

Rriten tensionet për çështjen e Groenlandës. Presidenti amerikan Donald Trump ka dërguar një letër kryeministrit të Norvegjisë, Jonas Gahr Støre, për një qëndrim që është cilësuar si kërcënues. Aty shefi i Shtëpisë së Bardhë deklaronte se, përderisa nuk ka marrë Çmimin Nobel për Paqen, nuk ndihet më i detyruar “të mendojë ekskluzivisht për paqen”.

“Tani mund të mendoj për atë që është e mirë dhe e përshtatshme për Shtetet e Bashkuara të Amerikës”, citohet të ketë thënë Trump. Në letër, presidenti amerikan rikthen pretendimet mbi Groenlandën, duke vënë në dyshim sovranitetin danez në ishull.

“Pse Danimarka duhet të ketë një ‘të drejtë pronësie’? Nuk ka dokumente të shkruara”, shkruhej ndër të tjera në letër. “Danimarka nuk është në gjendje ta mbrojë atë territor nga Rusia apo Kina. Dimë vetëm që një anije mbërriti atje qindra vite më parë, por edhe ne kishim anije që shkonin atje”, tha ndër të tjera Trump, duke minimizuar argumentet historike daneze.

Reagimi nga Groenlanda nuk ka vonuar. Kryeministri i ishullit, Jens-Frederik Nielsen, deklaroi se vendi i tij nuk është i gatshëm të pranojë presione. Ai theksoi se mbështetja e vendeve europiane përbën “një njohje të qartë se Groenlanda është një shoqëri demokratike me të drejtën për të marrë vetë vendimet e saj”. Ai theksoi se do të qëndrojnë të palëkundur te dialogu, respekti dhe e drejta ndërkombëtare.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)