Zelensky “bojkoton” planin e Trump për “Bordin e Paqes” në Gaza

Ukraina nuk do të jetë pjesë e “Bordit të Paqes”, iniciativës së presidentit amerikan Donald Trump, për Rindërtimin e Rripit të Gazës. Edhe pse kërkon bashkëpunim të ngushtë me Shtetet e Bashkuara, për ti dhënë fund luftës me Rusinë, në momentin aktual presidenti Volodymyr Zelensky ka shprehur qëndrimin kundër kësaj nisme.

Ai bëri të ditur se është ftuar të jetë pjesë e “Bordit të Paqes”, por pa shprehur konfirmim për prezencën. Përkundrazi, me qëndrimin e mbajtur, presidenti ukrainas dha sinjalet e një tërheqje të mundshme. Zelensky ka theksuar se nuk mund ta imagjinojë punën krah për krah me presidentin rus Vladimir Putin, duke riafirmuar qëndrimin e prerë të Kievit ndaj Moskës.

Lufta në Ukrainë ka hyrë në ditën e saj të 1,427-të, ndërsa situata e sigurisë mbetet e paqëndrueshme. Pasi një zyrtar i qeverisë konfirmoi se presidenti nuk do të jetë i pranishëm në Forumin Ekonomik Botëror të Davosit, është theksuar se Zelensky do të mund të marrë pjesë vetëm nëse do të zhvillohet takimi dypalësh me presidentin Trump, për nënshkrimin e të ashtuquajturës “marrëveshje prosperiteti”.

Ndërkohë, presidenti francez, Emmanuel Macron ka deklaruar nga Davosi se nuk është planifikuar asnjë takim i G7-ës për ditën e enjte, duke përgënjeshtruar zërat që qarkulluan më herët. Këto spekulime lidhen me një mesazh privat që Macron i kishte dërguar Donald Trumpit, ku raportohej se ishte përmendur edhe mundësia e ftesës së përfaqësuesve rusë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)