Pas 55 vitesh, Forumi Ekonomik i Davosit përgatitet të “braktisë” Alpet zvicerane

Pas më tepër se gjysmë shekulli, Forumi Ekonomik Botëror mund të mos zhvillohet më në Davos. Prej ekzaktësisht 55 viteve, vendi në Alpet zvicerane ka pritur çdo janar liderët më të fuqishëm të botës. Sipas “Financial Times”, drejtuesit e Forumit po shqyrtojnë mundësinë e zhvendosjes së përhershme ose të një formule “shëtitëse” mes disa qyteteve ku përfshihen Detroit, Dublini, Xhakarta dhe Buenos Aires.

Nisma është shtyrë nga Larry Fink, president i “BlackRock” dhe bashkëkryetar i përkohshëm i bordit të Forumit, i cili e ka kritikuar Davosin si gjithnjë e më elitar dhe të shkëputur nga realiteti ekonomik global. Sipas tij, samiti i fuqive globale duhet të zhvillohet edhe në qytete ku “ndërtohet realisht bota moderne”.

Vendndodhja aktuale po konsiderohet gjithnjë e më e papërshtatshme për një event që mbledh rreth 3 mijë pjesëmarrës, ndërsa vetëm masat e sigurisë i kushtojnë Zvicrës rreth 9 milionë franga çdo vit. Forumi Ekonomik Botëror është një fondacion jofitimprurës me seli në Gjenevë, i themeluar në vitin 1971 nga ekonomisti gjerman Klaus Schëab. Fillimisht ai u krijua për menaxhimin e financave të Europës, por vetëm gjashtë vite më pas, nga 1987-a mban emrin aktual dhe synon të “përmirësojë gjendjen e botës” duke bashkuar liderë të biznesit, politikës, akademisë dhe shoqërisë civile.

Aktualisht, forumi mbledh administratorët e kompanive më të mëdha globale, drejtues të shteteve dhe të qeverive, ministra, akademikë, përfaqësues të Organizatave Jo-Qeveritare dhe qindra gazetarë. Debati mbi të ardhmen e Davosit shënon një pikë kthese historike për samitin më të njohur global të elitës politike dhe ekonomike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)