“Nuk mund ta mbështes dot luftën”, shefi amerikan i Antiterrorizmit jep dorëheqjen

Shefi i Qendrës Kombëtare për Antiterrorizmin në SHBA, Joe Kent ka dhënë dorëheqjen duke deklaruar se nuk mund të mbështesë luftën kundër Iranit. Në një deklaratë të publikuar në profiling në rrjetin social X, ai tha se vendimi lidhet me bindjen se konflikti nuk është në interes të Shteteve të Bashkuara.

“Nuk mundem me ndërgjegje të pastër të mbështes luftën në Iran. Irani nuk përfaqësonte një kërcënim të menjëhershëm për vendin tonë dhe është e qartë se kjo luftë është nisur për shkak të presionit dhe lobimit të fuqishëm”, u shpreh Kent. Dorëheqja e tij konsiderohet largimi i parë i rëndësishëm nga administrata e Donald Trump pas shpërthimit të konfliktit.

Në letrën e dorëheqjes drejtuar presidentit amerikan, Kent theksoi se në fillim të mandatit të dytë të Trump kishte paralajmëruar për një fushatë dezinformimi. Sipas tij “nisi një fushatë dezinformimi që minoi plotësisht platformën ‘America First’ dhe mbolli ndjenja pro-luftës për të inkurajuar luftën kundër Iranit”.

Foto: X

Ai shtoi se kjo fushatë u përdor për ta bindur presidentin se Irani përbënte një kërcënim të menjëhershëm dhe se një sulm i shpejtë do të sillte një fitore të lehtë. “Kjo ishte një gënjeshtër dhe është e njëjta taktikë u përdor për të na tërhequr në luftën katastrofike kundër Irakut”, deklaroi Kent.

Veteran i luftës në Irak dhe prej vitesh mbështetës i Trump, Kent ka marrë pjesë në 11 misione luftarake. Në deklaratën e tij ai përmendi edhe bashkëshorten e ndjerë, Shannon Kent, një kriptografe ushtarake që humbi jetën në Siri. “Nuk mund të mbështes dërgimin e brezit të ardhshëm për të luftuar dhe vdekur në një luftë që nuk sjell asnjë përfitim për popullin amerikan”, përfundoi ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)