Izraeli bombardon fushat e gazit, Katari kundër, Irani: Do godasim çdo objekt energjetik në Gjirin Persik

Forcat Ajrore të Izraelit kanë ndërmarrë sulme ndaj objekteve të gazit natyror në jug të Iranit, duke përshkallëzuar ndjeshëm tensionet në rajon. Sipas një zyrtari izraelit, objektivi kryesor ishte uzina më e madhe e përpunimit të gazit në provincën Bushehr.

Televizioni shtetëror iranian raportoi se pjesë të objekteve të vendosura në zonën e posaçme ekonomike të energjisë në Parsin Jugor, në Asaluyeh, u goditën nga raketa të lëshuara nga ajo që e cilësoi si “armiku amerikano-sionist”.

Sipas mediave iraniane, sulmet prekën infrastrukturën e lidhur me fushën gjigante të gazit South Pars, e cila konsiderohet si rezervuari më i madh i gazit natyror në botë dhe ndahet me Katarin.

Kjo fushë siguron rreth 70% të konsumit të gazit në Iran dhe është në përdorim që nga fundi i viteve 1990, ndërsa objektet në këtë zonë ishin goditur edhe gjatë përplasjes 12-ditore në qershor 2025.

Sipas mediave ndërkombëtare, përfshirë Axios, sulmi ishte i koordinuar me Shtetet e Bashkuara, megjithëse kjo nuk është konfirmuar zyrtarisht nga të gjitha palët.

Pas sulmit, tregjet globale të energjisë reaguan menjëherë. Në bursën holandeze TTF, çmimi i gazit natyror arriti në 53 euro për megavat-orë, rreth 5% më i lartë nga niveli i hapjes.

Ndërkohë, nafta Brent u rrit me mbi 4%, duke iu afruar nivelit prej 108 dollarësh për fuçi, duke reflektuar shqetësimet për sigurinë energjetike globale dhe furnizimin nga rajoni i Gjirit.

Në reagim ndaj sulmeve, Irani ka kërcënuar se do të godasë infrastrukturën energjetike në rajon, duke përmendur objektiva në Arabinë Saudite, Emiratet e Bashkuara Arabe dhe Katarin.

Korpusi i Gardës Revolucionare Islamike publikoi gjithashtu një paralajmërim urgjent për evakuimin e disa objekteve energjetike në Gjirin Persik, duke i cilësuar ato si “objektiva legjitime”. Mes tyre përfshihen rafineri dhe fusha gazi në Arabinë Saudite, Emiratet e Bashkuara Arabe dhe Katar.

Autoritetet iraniane u bënë thirrje banorëve dhe punonjësve në këto zona që të largohen menjëherë për sigurinë e tyre.

Ndërkohë, Katari dënoi ashpër sulmin izraelit, duke e cilësuar atë si “një veprim të rrezikshëm dhe të papërgjegjshëm” në një moment tensioni të lartë në rajon.

Zëdhënësi i Ministrisë së Jashtme të Katarit paralajmëroi se sulmet ndaj infrastrukturës energjetike përbëjnë një kërcënim serioz për sigurinë globale, si dhe për stabilitetin rajonal dhe mjedisin.

Ai u bëri thirrje të gjitha palëve të tregojnë përmbajtje, të respektojnë ligjin ndërkombëtar dhe të shmangin shënjestrimin e objekteve kritike, duke theksuar nevojën urgjente për uljen e tensioneve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)