Tensionet mes Kinës dhe Amerikës shkojnë deri në orbitën e Tokës, 200 metra larg përplasjes së madhe

Jo vetëm në Tokë, tensionet mes Kinës dhe Amerikës shkojnë deri në orbitën e saj. Një satelit kinez ka kaluar shumë pranë një sateliti amerikan të rrjetit Starlink, në pronësi të kompanisë SpaceX, duke shmangur për pak një përplasje që mund të kishte pasoja serioze.

Sipas SpaceX, sateliti kinez, i lëshuar në hapësirë me raketën Kinetica-1, ka kaluar në një distancë prej rreth 200 metrash nga një satelit aktiv i Starlink, distancë kjo që konsiderohet jashtëzakonisht e rrezikshme në kushtet e orbitës. Ngjarja ka ndodhur dy ditë pas lëshimit të nëntë satelitëve nga kozmodromi Jiuquan, në një lartësi prej rreth 560 kilometrash mbi Tokë. Edhe pse nuk u raportua dëmtim dhe nuk pati përplasje, ekspertët e fushës e cilësojnë incidentin si një paralajmërim serioz.

Në orbitën e ulët të Tokës, objektet lëvizin me shpejtësi rreth shtatë kilometra në sekondë, çka do të thotë se edhe devijimet më të vogla në llogaritjet e trajektores mund të shkaktojnë aksidente katastrofike. SpaceX deklaroi se nuk kishte në kohë reale të dhëna të sakta për lëvizjet e satelitëve kinezë, duke e bërë të vështirë planifikimin e manovrave parandaluese.

Nga ana tjetër, kompania kineze CAS Space tha se përdor sistemet e saj të monitorimit dhe se është e gatshme të analizojë më tej incidentin, por theksoi se pas ndarjes së satelitëve nga raketa, kontrolli mbi lëvizjen e tyre është i kufizuar.

Ky rast ndodh në një kohë kur orbita e ulët e Tokës po mbipopullohet nga mijëra satelitë, veçanërisht për shkak të lëshimeve të shumta si Starlink, i cili aktualisht ka mbi nëntë mijë satelitë aktivë. Ekspertët paralajmërojnë se mungesa e një sistemi ndërkombëtar të detyrueshëm për menaxhimin e trafikut hapësinor rrit ndjeshëm rrezikun e përplasjeve, përfshirë edhe skenarin e njohur si Sindroma e Kesslerit, që mund të çojë në ndotje masive të orbitës dhe pasoja afatgjata globale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)