Tragjedi ajrore në Sudanin e Jugut, rrëzohet avioni me pasagjerë, nuk ka të mbijetuar

Një avion i vogël pasagjerësh është rrëzuar në Sudanin e Jugut, duke shkaktuar vdekjen e të gjithë 14 personave në bord. Lajmi u konfirmua nga Autoriteti i Aviacionit Civil i vendit, i cili bëri të ditur se një ekip hetimor është dërguar në vendngjarje për të zbardhur shkaqet e aksidentit.

Sipas informacioneve paraprake, avioni mund të jetë rrëzuar për shkak të kushteve të pafavorshme atmosferike, veçanërisht dukshmërisë së ulët. Mjeti fluturues humbi kontaktet me autoritetet rreth 30 minuta pas ngritjes.

Avioni, një Cessna 208 Caravan, ishte nisur nga qyteti i Yei dhe u rrëzua rreth 20 kilometra në jugperëndim të kryeqytetit Juba. Në bord ndodheshin piloti dhe 13 pasagjerë, mes të cilëve 12 shtetas sudanezë dhe 2 kenianë.

Sudani i Jugut vazhdon të përballet me sfida serioze në sektorin e transportit ajror, i cili konsiderohet ndër më pak të zhvilluarit dhe me standarde të ulëta sigurie. Që nga shpallja e pavarësisë në vitin 2011, vendi ka regjistruar mbi 55 aksidente ajrore me dhjetëra viktima, shpesh të lidhura me përdorimin e avionëve të vjetër dhe mungesën e zbatimit të rregulloreve të sigurisë.

Një tjetër aksident i rëndë ndodhi në janar 2025, kur rreth 20 punëtorë të industrisë së naftës humbën jetën pas rrëzimit të avionit të tyre vetëm pak minuta pas ngritjes. Ndërkohë, aksidenti më fatal mbetet ai i nëntorit 2015, kur një avion Antonov u rrëzua pranë aeroportit të Jubës, duke lënë të vdekur 41 persona.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)