84 vite në të njëjtin vend pune, punonjësi që çdo shef e ëndërron

Një histori e jashtëzakonshme përkushtimi dhe qëndrueshmërie vjen nga Brazili, ku Walter Orthmann, një punonjës i industrisë tekstile, ka hyrë zyrtarisht në Librin Guinness të Rekordeve Botërore si personi me karrierën më të gjatë në të njëjtën kompani. Në moshën 100-vjeçare, Orthmann plotësoi 84 vite e 9 ditë punë të pandërprerë në të njëjtin vend.

Gjithçka nisi në vitin 1938, kur ai ishte vetëm 15 vjeç dhe pranoi ofertën për punë të përkohshme në kompaninë Industrias Renaux, në qytetin Brusque, në veri të Brazilit, një zonë me traditë të fortë në industrinë tekstile. Ajo që filloi si një angazhim modest, u kthye në një karrierë jetësore.

Falë aftësive të tij mendore dhe njohjes së gjuhës gjermane, e përhapur në atë rajon, Orthmann avancoi shpejt në hierarkinë e kompanisë. Me kalimin e viteve, ai u bë pjesë e sektorit të shitjeve, ku luajti një rol kyç në marrëveshjet me klientët strategjikë.

Kolegët e përshkruajnë si një mentor të heshtur, që udhëhiqte me shembull dhe durim. Gjatë dekadave, ai u përshtat me ndryshimet e mëdha teknologjike, nga librat klasikë të llogarive deri te softuerët modernë dhe zinxhirët globalë të furnizimit. Kompania, sot e njohur si RenauxView, nuk ka menduar kurrë ta zëvendësojë, ndërsa Orthmann ka festuar ditëlindjen e 102.

Ligjet braziliane të pensioneve kanë ndikuar në këtë rrugëtim, pasi dalja në pension nuk e detyron automatikisht një punonjës privat të ndërpresë punën. Vetë Orthmann thotë se sekreti i tij është i thjeshtë: “Të jesh gjithmonë kureshtarë, të mësosh gjithmonë dhe të bësh atë që e do vërtet.”

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)