U pagua gabimisht nga kompania me 330 paga, punonjësi del fitues në gjykatë dhe mban 164 mijë eurot

Një gabim i madh në sistemin e pagave në një kompani shërbimesh financiare në Kili përfundoi në gjykatë, pasi një punonjës mori në llogarinë e tij bankare 330-fishin e pagës mujore.

Incidenti ndodhi në vitin 2022, kur gjatë procesit të pagesave departamenti i burimeve njerëzore kreu një gabim administrativ dhe transferoi në llogarinë e punonjësit një shumë që arrinte rreth 164 mijë euro.

Sipas raportimeve, punonjësi e vuri re menjëherë shumën e pazakontë në llogarinë e tij dhe e informoi kompaninë për gabimin. Përgjegjësit e kompanisë i kërkuan të paraqitej në bankë për të nisur procedurat e kthimit të parave.

Megjithatë, ngjarja mori një kthesë të papritur. Punonjësi nuk e ktheu shumën dhe, pak kohë më pas, paraqiti dorëheqjen nga puna përmes avokatit të tij, duke ndërprerë marrëdhënien me kompaninë.

Kompania vendosi ta çojë çështjen në gjykatë, duke ngritur padi për përvetësim dhe duke kërkuar rikthimin e parave si dhe ndëshkimin e ish-punonjësit.

Pas shqyrtimit të rastit, gjykata arriti në përfundimin se nuk kishte përgjegjësi penale nga ana e punonjësit. Sipas gjyqtarëve, për të provuar veprën penale të përvetësimit të paligjshëm duhet të ekzistojë një detyrim i qartë ligjor për kthimin e shumës ose një veprim mashtrues.

Në këtë rast, transferimi i parave ishte kryer gabimisht nga vetë kompania dhe nuk kishte asnjë provë se punonjësi kishte ndërhyrë në sistemin e pagesave apo kishte shkaktuar mashtrim.

Gjykata theksoi gjithashtu se punonjësi nuk kishte krijuar vetë gabimin dhe nuk kishte manipuluar procesin e pagave. Mbrojtja argumentoi se klienti i tyre thjesht kishte marrë një transfertë bankare të bërë nga kompania dhe se ligji penal nuk mund të ndëshkojë dikë vetëm për përfitimin nga gabimi i një pale tjetër.

Përfundimisht, gjykata vendosi se nuk ishte vërtetuar asnjë vepër penale, duke e liruar ish-punonjësin nga çdo akuzë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)