Familja nuk e lejon, tërhiqet nga tregu birra John Lemon

Një birrë artizanale franceze nga Bretanja është përfshirë në një çështje ndërkombëtare ligjore pasi përdori një emër që lidhet me ish-anëtarin e grupit The Beatles, John Lennon.

Produkti, i quajtur “John Lemon”, ishte krijuar nga një birrari e vogël në zonën e Finistère dhe kishte si ide një lojë fjalësh, pasi përmbante shije limoni dhe xhenxhefili. Megjithatë, emri dhe dizajni i etiketës u konsideruan shumë të ngjashëm me identitetin e John Lennon, duke shkaktuar reagimin e përfaqësuesve ligjorë që menaxhojnë të drejtat e tij.

Sipas raportimeve, marka “John Lennon” është e mbrojtur ligjërisht dhe përdorimi i saj pa autorizim mund të përbëjë shkelje të të drejtave tregtare. Për këtë arsye, prodhuesi i birrës u përball me një paralajmërim ligjor dhe rrezik gjobash të larta, duke përfshirë edhe kërkesën për kompensim financiar.

Përballë kostove të mundshme dhe një procesi gjyqësor të gjatë, kompania artizanale pranoi një marrëveshje. Sipas saj, birra nuk do të tërhiqet menjëherë nga tregu, por rreth 5 mijë shishe të prodhuara do të lejohen të shiten deri në mes të vitit 2026. Pas kësaj periudhe, produkti do të zhduket përfundimisht nga tregu me këtë emër dhe imazh.

Ironikisht, çështja ligjore ka sjellë një efekt të kundërt. Lajmi është bërë viral dhe kërkesa për produktin është rritur ndjeshëm, duke e kthyer birrën në një objekt të kërkuar nga koleksionistët.

Rasti nuk është i izoluar, pasi edhe më parë produkte të ngjashme në Evropë janë detyruar të ndryshojnë emrin për shkak të mbrojtjes së fortë të markës “John Lennon”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)