Doni të jetoni në Spanjë? Ky fshat iu ofron banim falas dhe punë të garantuar

Një fshat i vogël në Spanjë ka ndërmarrë një nismë të pazakontë për të luftuar zbrazjen e zonave rurale, duke ofruar banim falas dhe punësim të garantuar për familjet që janë të gatshme të zhvendosen.

Bëhet fjalë për Arenillas, në provincën e Sorias, një zonë që prej vitesh përballet me rënie të popullsisë. Aktualisht, fshati numëron rreth 40 banorë dhe autoritetet lokale po kërkojnë të tërheqin banorë të rinj, veçanërisht familje me fëmijë, për të siguruar vazhdimësinë e komunitetit.

Bashkia ka rehabilituar disa banesa gjatë viteve të fundit dhe tashmë ofron një shtëpi komunale të pajisur plotësisht, pa pagesë qiraje për familjen që do të përzgjidhet. Përveç strehimit, ofrohet edhe një vend pune si punëtor ndërtimi për mirëmbajtjen dhe restaurimin e objekteve publike, me kontratë të rregullt dhe të ardhura të qëndrueshme.

Një mundësi shtesë është menaxhimi i barit ose i qendrës sociale të fshatit, një hapësirë e rëndësishme për jetën komunitare, ku zhvillohen aktivitete kulturore dhe takime mes banorëve. Ky rol nuk është i detyrueshëm, por konsiderohet një avantazh për aplikuesit.

Autoritetet theksojnë se preferohen familje që synojnë të vendosen për një kohë të gjatë dhe të integrohen në jetën lokale. Për fëmijët ofrohet transport falas drejt shkollës në Berlanga de Duero, rreth 20 kilometra larg, ndërsa zona ka gjithashtu lidhje interneti për ata që mund të punojnë në distancë.

Të interesuarit duhet të kontaktojnë bashkinë e Arenillas dhe të paraqesin një kërkesë me detaje mbi situatën familjare, motivimin dhe përvojën e tyre.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)