Kishin fshehur 5 kallashnikovë, pranga 2 shqiptarëve në Itali, një tjetër u kap në Shqipëri

Një operacion kundër trafikut ndërkombëtar të armëve ka çuar në sekuestrimin e një arsenali të rëndë dhe arrestimin e disa personave në kufirin lindor të Italisë.

Guardia di Finanza ka konfiskuar pesë automatikë kallashnikov dhe 356 fishekë, ndërsa dy shtetas shqiptarë janë vënë në pranga.

Operacioni u zhvillua nga Guardia di Finanza e Kompanisë Monfalcone, në bashkëpunim me Njësinë e Policisë Ekonomike dhe Financiare të Trieste-GICO.

Gjatë një kontrolli rutinë në pikën kufitare sllovene Sant’Andrea, autoritetet ndaluan një furgon me targa shqiptare që po hynte në territorin italian.

Në mjet ndodheshin pesë pasagjerë dhe dy shoferë, të gjithë me origjinë shqiptare. Sipas autoriteteve italiane, nervozizmi i shoferëve gjatë kontrollit ngjalli dyshime, duke çuar në një verifikim të detajuar të automjetit dhe bagazheve.

Gjatë kontrollit, në një valixhe jashtëzakonisht të rëndë, u zbuluan tre pushkë sulmi AK-47 të fshehura midis shtresës së brendshme të valixhes dhe veshjeve. Kontrollet e mëtejshme zbuluan edhe dy automatikë të tjerë, pesë karikatorë dhe 356 fishekë, duke konfirmuar dyshimet për trafik armësh.

Armët dhe telefonat celularë të personave të përfshirë u sekuestruan, ndërsa dy shoferët u arrestuan me akuzën e shkeljes së rregulloreve mbi armët dhe municionin. Hetimet vijuan në bashkëpunim me autoritetet shqiptare dhe u zgjeruan në nivel ndërkombëtar.

Si rezultat i këtij bashkëpunimi, në territorin shqiptar, në zonën e Hanit të Hotit, u ndalua edhe personi i dyshuar si organizator dhe përgjegjës për dërgimin e arsenalit drejt Italisë. Autoritetet kanë bërë të ditur se hetimet janë ende në vijim për të zbuluar rrjetin e plotë të përfshirë në këtë aktivitet kriminal.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)