Morën 55 mijë euro ryshfet, SPAK çon për gjykim dy ish-prokurorët e Sarandës

Prokuroria e Posaçme ka mbyllur hetimet dhe ka dërguar për gjykim dosjen penale ndaj ish-kryeprokurorit të Sarandës, Kledian Llaho, dhe ish-prokurorit Çlirim Shahini, i cili aktualisht ushtron profesionin e avokatit.

Sipas SPAK, të dy akuzohen për ushtrim të ndikimit të paligjshëm dhe përfshirje në një skemë korrupsioni, me qëllim zbutjen e masës së sigurimit ndaj shtetasit Pando Papuçi, i shpallur në kërkim për ndërtim pa leje.

Papuçi kishte arritur t’i shmangej drejtësisë për rreth dy vite, derisa u arrestua dhe u paraqit në gjykatë për vlerësimin e masës së sigurisë. Seanca gjyqësore u zhvillua me shpejtësi, ndërsa brenda vetëm një ore, me kërkesë të prokurorisë, gjyqtarja Edona Vajushi vendosi ndryshimin e masës, duke e zbutur atë.

Sipas organit të akuzës, Llaho dhe Shahini i kanë kërkuar para Papuçit në këmbim të ndërhyrjes në procedurat gjyqësore, për të siguruar një masë më të lehtë sigurie. Hetimet e SPAK kanë dokumentuar ekzistencën e një skeme të organizuar korrupsioni, ku funksionarë të drejtësisë kërkonin përfitime monetare për të favorizuar trajtimin e çështjeve penale.

Prokurorja Manjola Kajana deklaron se Kledian Llaho dyshohet të ketë marrë 30 mijë euro, ndërsa Çlirim Shahini 25 mijë euro, në këmbim që t’i kërkonte gjykatës masën “detyrim paraqitje”.

Në total, sipas SPAK, 55 mijë euro janë paguar për zbutjen e një mase sigurimi, duke zbuluar një nga skemat më të rënda të korrupsionit në sistemin e drejtësisë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)