Mourinho kthehet “Special One”, stretegjia për golin historik të portierit Trubin

Të fitosh një ndeshje, kundër Realit të Madridit, me një gol në sekondat e fundit që të dhuron kualifikimin në Champions League duket maksimumi i kënaqësisë në futboll. Por ka edhe më tepër: që goli të shënohet me kokë nga... portieri. Kjo ndodhi te Benfica, ku heroi i mbrëmjes u bë gardiani Anatoily Trubin.

Në “Estadio da Luz” po mbretëronte konfuzioni. Lojtarët e Benfica-s, trajneri Jose Mourinho dhe tifozët mendonin se fitorja 3-2 ndaj Realit ishte e mjaftueshme për të siguruar vendin në “play-off”. Por në çastet e fundit erdhi lajmi: Nevojitej edhe goli i katërt, sepse Marseille i kishte parakaluar në renditje prej golavarazhit.

Pa asnjë zëvendësim në dispozicion dhe në sulmin final nga një goditje standarde pranë mesit të fushës, vendimtare ishte strategjia e Mourinho-s. Trajneri i kërkoi portierit Trubin të dilte në zonën e “Los Blancos”, aty ku ndodheshin edhe tetë futbollistë të tjerë. Një lëvizje që e riktheu në “Special One” që të gjithë e njohin.

“Për Benfica-n është prestigj të fitojë ndaj Realit. Diçka fantastike. Kur bëra zëvendësimin e fundit më thanë që fitorja 3-2 na mjaftonte dhe duhej të mbroheshim. Por pak sekonda më vonë, asistentët më njoftuan se na duhej edhe një gol për tu kualifikuar. Ishte episod me fat, shënuam golin e katërt falë djaloshit tonë trupmadh”, tha Mourinho.

“Kam fituar dhe humbur shumë ndeshjen në karrierë. Por, kurrë nuk kisha fituar me portierin që shënonte në minutën e fundit. Mendoja se i kisha parë të gjitha, por më ndodhi edhe ky episod që nuk e prisja”, vijoi trajneri.

Edhe portieri nuk e kishte të qartë që duhej të jepte kontributin në sulm. Trubin tha: “Të gjithë po më thoshin të dilja në sulm. Pashë nga trajneri që më kërkoi të shkoja në zonën kundërshtare dhe u nisa. Nuk di çfarë të them... ishte një moment i çmendur. Jam 24 vjeç dhe është hera e parë që shënoj. Nuk jam mësuar të bëj gola”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)