Moratti për skandalin e arbitrave: Asnjë krahasim me Calciopolin, Interi nuk është ndihmuar

Debati mbi situatën e arbitrimit në futbollin italian vijon të ndizet, ndërsa ish-presidenti i Inter Milan, Massimo Moratti, ka minimizuar zhvillimet e fundit, duke i cilësuar ato larg përmasave të skandalit të Calciopolit.

Në një intervistë për NapoliNetwork, Moratti u shpreh se situata aktuale duket si “një luftë e vogël mes arbitrave” dhe nuk mund të krahasohet me atë që ndodhi në vitet e kaluara. “Në krahasim me Calciopolin, kjo është një gjë e vogël”, theksoi ai.

Komentet e tij vijnë në një moment kur arbitri dhe drejtuesi i caktimit të gjyqtarëve, Gianluca Rocchi, është vetëpezulluar pas akuzave për përfshirje në mashtrim sportiv.

Moratti theksoi se çështja ka të bëjë kryesisht me arbitrimin dhe jo me klubet, duke shtuar se gjatë drejtimit të tij nuk ka pasur kontakte me gjyqtarët për të ndikuar në vendimet e tyre. “Kjo ide nuk më përkiste. Madje kisha respekt dhe frikë prej tyre, sepse mund të vendosnin fatin e ekipit”, u shpreh ai.

Ai mbështeti gjithashtu idenë e shortit për caktimin e arbitrave, duke e cilësuar si një zgjidhje që do të rriste transparencën dhe do të mbante klubet larg çdo ndikimi.

Moratti nënvizoi se Interi nuk ka përfituar nga vendimet e arbitrave, as në fitore dhe as në humbje, duke pranuar se gabimet ekzistojnë, por janë pjesë e natyrshme e lojës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)