“Nuk iki nga shtëpia, nuk i dua 1.1 milionë paunde”, fermeri refuzon ofertën e majme

Një projekt i madh ndërtimi në Britaninë e Madhe ka ndezur debat të fortë mes autoriteteve dhe banorëve lokalë, ndërsa një fermer 76-vjeçar ka vendosur të kundërshtojë hapur planin për zhvillim urban në tokën ku jeton prej vitesh.

Alan French, i cili banon në një shtëpi me vlerë rreth 1.1 milionë paund në zonën Hyde, ka refuzuar të largohet nga prona e tij, pavarësisht planit për ndërtimin e 2,150 banesave në tokë të gjelbër. Ai jeton aty që prej vitit 2002 dhe e konsideron pronën si shtëpinë e tij të përhershme.

“Këtë herë u thashë të largohen dhe se nuk do të shkoj askund. Jam shumë i moshuar për t’u zhvendosur përsëri”, shprehet ai, duke shtuar se jeton me frikën se mund të detyrohet të largohet.

Projekti i njohur si “Godley Green Garden Village” parashikon ndërtimin e dy fshatrave të rinj në një sipërfaqe prej 256 hektarësh. Megjithatë, French është një nga pronarët që ka refuzuar marrëveshjet me autoritetet dhe druhet se mund të përballet me një urdhër shpronësimi të detyruar.

Ai kujton se edhe në të kaluarën familja e tij ka humbur prona për shkak të vendimeve të tilla. “Jeta ime është ndikuar nga këto urdhra blerjeje. Nuk dua të më ndodhë sërish”, tha ai.

Edhe banorë të tjerë, si fermerja në pension Anne Tym, kanë refuzuar të dorëzojnë tokën. “Është toka ime, pse duhet të largohem?”, u shpreh ajo.

Nga ana tjetër, autoritetet lokale mbrojnë projektin, duke theksuar nevojën për banesa të reja dhe zhvillim të zonës. Megjithatë, kundërshtimet janë të shumta, me mijëra ankesa nga komuniteti që e sheh projektin si kërcënim për natyrën dhe jetën rurale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)