Bleu kasafortën për 15 euro, por brenda saj fshihej një “thesar”

Një histori e rrallë ndershmërie vjen nga Gjermania, ku një blerje e zakonshme në internet u kthye në një zbulim të jashtëzakonshëm, por edhe në një gjest që ka tërhequr vëmendjen e autoriteteve dhe publikut.

Një burrë 57-vjeçar nga qyteti Trostberg, në Bavari, bleu një kasafortë të përdorur për vetëm 15 euro përmes një faqeje shitblerjesh. Fillimisht gjithçka dukej normale, deri në momentin kur ai vendosi ta instalonte në bodrumin e shtëpisë dhe vuri re një pjesë të pazakontë brenda saj.

Pas një kontrolli më të detajuar, ai zbuloi një ndarje sekrete, ku ishte fshehur një lingotë ari prej 250 gramësh. Sipas çmimeve aktuale të tregut, vlera e saj llogaritet mes 32 mijë dhe 34 mijë eurove.

Megjithatë, ajo që e bën këtë histori të veçantë është reagimi i blerësit. Në vend që ta mbante apo ta shiste arin, ai u drejtua menjëherë në polici për të raportuar zbulimin dhe për të kërkuar mënyrën e kthimit tek pronarët e ligjshëm.

Autoritetet nisën hetimet dhe zbuluan se kasaforta i përkiste gjyshit të shitësit, i cili kishte harruar prej vitesh se kishte fshehur aty lingotën. Pasi u verifikua se ari nuk kishte origjinë të paligjshme, çështja u mbyll pa pasoja ligjore.

Edhe më befasues është fakti se të dyja palët vendosën të mos hapin konflikt, ndërsa blerësi mbeti i vendosur për ta kthyer arin. Kasaforta kishte qëndruar për muaj të tërë pa u shitur dhe ishte pranë përfundimit në mbeturina.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)