Ekspertët paralajmërojnë, pse nuk duhet të printoni faturën në bankomat

Ekspertët e sigurisë kibernetike po paralajmërojnë qytetarët që të shmangin printimin e faturave në bankomat, pasi kjo praktikë mund të rrezikojë të dhënat personale dhe financiare.

Sipas tyre, kuponët e printuar pas një transaksioni përmbajnë informacione të rëndësishme si detajet e llogarisë, pjesë të numrit të kartës, si dhe orën, datën dhe vendndodhjen e saktë të bankomatit. Këto të dhëna mund të përdoren nga mashtruesit për të ndërtuar skema mashtrimi dhe për t’u paraqitur si banka apo institucione të tjera financiare.

Në një kohë kur gjithnjë e më shumë shërbime po kalojnë në formatin digjital, ekspertët sugjerojnë që qytetarët të zgjedhin opsionin për të mos printuar faturën dhe të kontrollojnë transaksionet përmes aplikacioneve bankare ose emailit.

Në rastet kur printimi është i domosdoshëm, këshillohet që faturat të mos hidhen në koshat publikë pranë bankomatit. Ato duhet të ruhen dhe më pas të shkatërrohen në mënyrë të sigurt, duke prerë pjesët ku shfaqen të dhënat sensitive.

Përdorimi i alternativave digjitale jo vetëm që redukton rrezikun e ekspozimit të informacionit personal, por edhe shmang humbjen apo keqpërdorimin e dokumenteve fizike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)