Presion për dosjet sensitive, shtohet mbrojtja për Altin Dumanin

Këshilli i Lartë i Prokurorisë ka miratuar kërkesën e drejtuesit të SPAK, Klodian Braho, për shtimin e masave të mbrojtjes për prokurorin Altin Dumani, për shkak të presioneve të vazhdueshme që lidhen me çështje hetimore sensitive.

Burime bëjnë me dije se kërkesa është paraqitur në kuadër të rrezikut të shtuar që vjen nga hetimet ndaj ish-zyrtarëve dhe funksionarëve të lartë, ku Dumani ka qenë i përfshirë drejtpërdrejt gjatë ushtrimit të detyrës. Për shkak të funksionit të tij, Dumani ka qenë nën masa të rrepta sigurie gjatë gjithë mandatit trevjeçar si drejtues i Prokurorisë së Posaçme.

Masat e mbrojtjes vijojnë edhe pas përfundimit të mandatit, pasi aktualisht Altin Dumani ushtron detyrën si drejtues i drejtorisë juridiksionale dhe angazhohet edhe në aktivitete jashtë vendit.

Ndërkohë, për shkak të rrezikut që lidhet me hetimet ndaj krimit të organizuar dhe korrupsionit, nën masa sigurie ndodhen edhe drejtues të tjerë të sistemit të drejtësisë. Mes tyre janë kreu i SPAK Klodian Braho, kryetari i GJKKO-së Erjon Bani, si dhe disa gjyqtarë e prokurorë të posaçëm.

Në listë përfshihen gjithashtu gjyqtarja Irena Gjoka, prokurorët Doloreza Musabelliu, Adnan Xholi, Dritan Prenci, Vladimir Mara, si dhe zyrtarë të tjerë të drejtësisë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)