“Do shembet Pallati i Kongreseve dhe Shtëpia e Fëmijëve”, Tabaku: Tregoni inventarin e pronave

Deputetja e Partia Demokratike e Shqipërisë, Jorida Tabaku, zhvilloi një interpelancë në Kuvend, të kërkuar me kryeministrin Edi Rama, por që u përfaqësua nga ministrja Delina Ibrahimaj, duke shkaktuar debate dhe tensione në sallë.

Në fjalën e saj, Tabaku akuzoi qeverinë se përmes Korporata Shqiptare e Investimeve ka ndërtuar një mekanizëm për “privatizimin e shtetit” dhe përvetësimin e pasurive publike, duke shmangur ligjet dhe kontrollin demokratik. Ajo e cilësoi këtë si një evolucion të qeverisjes “nga korrupsioni i vogël tek kapja e shtetit dhe më pas privatizimi i tij”.

Sipas saj, Korporata nuk funksionon për të tërhequr investime, por si një strukturë paralele pa transparencë, ku mungojnë tenderët, gara dhe llogaridhënia. Tabaku ngriti pikëpyetje mbi mënyrën e përzgjedhjes së investitorëve, vlerën e pronave publike të transferuara dhe mungesën e publikimit të të dhënave financiare.

Ajo përmendi edhe raste konkrete, si projektet mbi pasuri publike dhe zhvillimin e kullave, duke vënë në dyshim interesin publik dhe konkurrencën reale.

“Cili është inventari i këtyre pronave që ka kjo korporatë? Mbi çfarë parimesh bëhen marrëveshjet me privatët? Si përzgjidhen dhe si garantohet që korporata nuk është e lidhur me krimin, siç ka ndodhur me PPP-të. Mbi çfarë parimi është vendosur që Pallati i Kongreseve t’i kalojë korporatës, që mund të çojë në shembjen e tij dhe ndërtimin e kullave? E njëjta gjë edhe për shtëpinë e fëmijës ‘Zyber Hallulli’. Ndaj Rama duhet të vinte të jepte llogari. Asnjë transparencë. Edhe për një stilolaps kërkohet transparencë, po për projektet e mëdha?”, tha Tabaku.

Në përfundim, deputetja paralajmëroi se këto mekanizma po krijojnë një sistem paralel që, sipas saj, rrezikon transparencën, konkurrencën e lirë dhe procesin e integrimit europian të vendit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)