150 avionë dhe njësia elitare e FBI, zbulohen detajet si u arrestua Maduro

Një operacion jashtëzakonisht kompleks i forcave elitare amerikane çoi gjatë orëve të para të mëngjesit të 2 janarit në kapjen e presidentit venezuelas Nicolas Maduro dhe bashkëshortes së tij. Misioni, i koduar “Operation Absolute Resolve”, u përshkrua nga Shefi i Shtabit të Përbashkët të SHBA-së, gjenerali Dan Caine, si një operacion i përgatitur me muaj të tërë dhe i ekzekutuar brenda pak orësh, ku çdo hallkë ishte jetike për suksesin final.

Sipas Caine, operacioni ishte rezultat i një bashkëpunimi të ngushtë mes të gjitha degëve të ushtrisë amerikane dhe agjencive të inteligjencës. Për muaj me radhë, strukturat e specializuara kishin ndjekur nga afër lëvizjet e Maduro-s, duke mbledhur informacione të detajuara mbi rutinën e tij të përditshme, vendbanimin, udhëtimet dhe masat e sigurisë. CNN raportoi më herët se CIA kishte vendosur një ekip të vogël brenda Venezuelës gjatë verës, me mision të qartë: vëzhgimin konstant të presidentit venezuelas.

Faza operative nisi vonë të premten në mbrëmje, kur më shumë se 150 avionë dhe helikopterë u ngritën nga rreth 20 baza ajrore dhe detare në të gjithë hemisferën perëndimore. Helikopterët që transportonin forcën elitë fluturuan në lartësi shumë të ulët, rreth 30 metra mbi sipërfaqen e ujit, për të shmangur zbulimin nga radarët venezuelas.

Sipas CNN, në mbështetje të tyre u kryen goditje të koordinuara për të neutralizuar çdo kërcënim të mundshëm. Rreth orës 01:00 të mëngjesit, forcat elitare mbërritën në kompleksin e Maduro-s në Karakas. Aty, sipas Caine, pati disa “përplasje në vetëmbrojtje”, pasi trupat amerikane u qëlluan gjatë hyrjes në objektiv.

Një rol kyç në operacion luajti edhe “Hostage Rescue Team” e FBI-së, një njësi elitare e specializuar në arrestime me rrezik të lartë dhe operacione të fshehta. Anëtarët e kësaj njësie ishin të integruar drejtpërdrejt me forcat ushtarake amerikane në terren.

Pas kapjes, Maduro dhe bashkëshortja e tij u evakuuan nga Venezuela rreth orës 03:29 dhe u transferuan në anijen luftarake USS Iwo Jima, nga ku po dërgohen drejt Nju Jorkut për t’u përballur me drejtësinë. Presidenti Donald Trump e cilësoi operacionin si një demonstrim unik të fuqisë amerikane, duke theksuar se “asnjë vend tjetër në botë nuk mund ta realizonte një mision të tillë”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)