Sulmohet rezidenca e zv/Presidentit amerikan JD Vance, arrestohet një i dyshuar

Autoritetet amerikane kanë arrestuar një individ të dyshuar për një incident në rezidencën e zv/Presidentit të SHBA-së, JD Vance, në Cincinnati.

Ndalimi i të dyshuarit u bë herët mëngjesin e të hënës. Sipas policisë së Cincinnatit, Shërbimi Sekret i SHBA-së kërkoi ndërhyrjen e forcave të rendit rreth orës 00:15, pasi agjentët vunë re një person që po “vraponte në drejtim të lindjes” pranë rezidencës.

Dispeçeri i policisë e konfirmoi informacionin për mediat lokale, përfshirë Fox News.

Mediat lokale raportojnë se disa dritare të banesës janë thyer, duke dyshuar se dëmtimet janë shkaktuar nga të shtënat, por fatmirësisht, asnjë person nuk u lëndua gjatë incidentit.

Një zëdhënës i Shërbimit Sekret i tha Newsweek se agjentët janë ende duke mbledhur informacione dhe se një përditësim zyrtar do të publikohet së shpejti.

“Po mbledhim të gjitha të dhënat përpara se të japim një deklaratë të plotë”, tha zëdhënësi.

Sipas stacionit lokal WLWT, zv/Presidenti Vance dhe familja e tij nuk ndodheshin në rezidencë në momentin e incidentit. Megjithatë, raportohet se ai kishte kaluar javën e kaluar në Cincinnati dhe ishte larguar të dielën pasdite.

Autoritetet e qytetit kishin njoftuar më herët se rrugët përreth rezidencës së Vance do të mbylleshin nga mbrëmja e 29 dhjetorit deri në pasditen e 4 janarit, si pjesë e masave të sigurisë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)