Agjentët e emigracionit vrasin një grua në Minneapolis, Trump: Ishte vetëmbrojtje

Një agjent i emigracionit në SHBA qëlloi për vdekje një grua 37-vjeçare në qytetin e Minneapolis, duke shkaktuar zemërim dhe një shkëmbim akuzash të ndërsjella, pasi zyrtarët lokalë hodhën poshtë pretendimin e administratës Trump se bëhej fjalë për një vetëmbrojtje.

Departamenti i Sigurisë Kombëtare tha se gruaja, Renee Nicole Good ishte një protestuese e dhunshme dhe u përpoq të përplaste me makinë agjentët e Emigracionit dhe Doganave.

Por kryebashkiaku i Minneapolis, Jacob Frey deklaroi të kundërtën duke u shprehur se agjenti e përdori pushtetin e tij në mënyrë të pamatur çka çoi në humbjen e jetës së dikujt.

Qindra agjentë të ICE janë vendosur në Minneapolis, në shtetin e Minesotës, si pjesë e masave të Shtëpisë së Bardhë kundër emigracionit të paligjshëm.

Videot e postuara në mediat sociale nga kalimtarët duket se tregojnë momentin e të shtënave, të cilat ndodhën rreth orës 10:25 sipas orës lokale të mëngjesit të së mërkurës.

Për ngjarjen reagoi dhe presidenti Trump në rrjetet sociale, duke shkruar se agjenti i emigracionit u përplas egërsisht dhe shpëtoi për fat nga vdekja. Ai fajësoi të Majtën Radikale për sulm dhe shënjestërim të oficerëve të zbatimit të ligjit dhe agjentëve të ICE.

Shefi i policisë së Minneapolis, Brian O'Hara, tha se shoferja ishte në automjetin e saj dhe po bllokonte rrugën në Portland Avenue. Më pas asaj iu afrua një oficer federal i zbatimit të ligjit, dhe ajo tentoi të largohej.

Guvernatori i Shtetit të Minesotës, Tim Walz, gjithashtu kundërshtoi deklaratat federale për incidentin.

"Mos i besoni kësaj makine propagande", shkroi Walz në përgjigje të një postimi të Departamentit të Sigurisë Kombëtare në lidhje me të shtënat.

"Shteti do të sigurojë që të ketë një hetim të plotë, të drejtë dhe të shpejtë për të siguruar llogaridhënie dhe drejtësi."

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)