Sërish telashe për djalin e presidentit, ish partnerja: Nuk jep para për rritjen e vajzës

Ish-partnerja e Hunter Biden dhe nëna e vajzës së tij 7-vjeçare, Lunden Roberts, ka depozituar një kërkesë në një gjykatë të Arkansas për të rikthyer në shqyrtim çështjen e mbështetjes financiare dhe për të kërkuar burgosjen e djalit të ish presidentit të Shteteve të Bashkuara, nëse ai vazhdon të mos respektojë marrëveshjen e arritur në vitin 2023.

Roberts pretendon se Hunter Biden ka shkelur kushtet e marrëveshjes, sipas së cilës ai kishte rënë dakord të kontribuojë në mbështetjen financiare të vajzës së tyre, Navy Joan Roberts.

Ajo argumenton se të ardhurat e tij kanë ndryshuar ndjeshëm që nga vendimi i fundit dhe kërkon një modifikim të shumës së mbështetjes, duke theksuar se vajza e saj është e privuar nga niveli i njëjtë i jetesës si fëmijët e tjerë të familjes Biden.

Në dokumentet e paraqitura, Roberts kërkon që gjykata të urdhërojë burgosjen e Hunter Biden deri në përmbushjen e detyrimeve financiare, duke e konsideruar këtë një masë për të siguruar respektimin e vendimit të gjykatës.

Në vitin 2023, palët kishin rënë dakord për një marrëveshje sipas së cilës Biden pranoi të uli mbështetjen mujore nga 20,000 dollarë në 5,000 dollarë dhe të përdorte të ardhurat nga shitjet e veprave të tij artistike për të mbështetur vajzën. Roberts hoqi dorë gjithashtu nga kërkesa që vajza të merrte mbiemrin Biden, pjesë e marrëveshjes së arritur atëherë.

Në këtë moment, gjykata nuk ka marrë ende vendim mbi kërkesën për arrestimin e Hunter Biden, dhe nuk ka deklarata publike zyrtare nga avokatët e tij lidhur me këtë kërkesë të fundit.

Hunter Biden e mohoi për një kohë të gjatë se ishte babai i vajzës së vogël, derisa një test ADN-je konfirmoi atësinë në vitin 2019.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)