“Ne do ta marrim uraniumin”, Trump: Irani të zgjedhë marrëveshjen ose asgjësimin

Presidenti i Shteteve të Bashkuara të Amerikës, Donald Trump ka lëshuar deklarata të forta ndaj Iranit, duke paralajmëruar se SHBA-të do ta marrin kontrollin mbi uraniumin e pasuruar iranian dhe se Teherani rrezikon asgjësimin nëse nuk pranon një marrëveshje me Uashingtonin.

Në një intervistë për Fox News, Trump foli për sulmet ajrore amerikane ndaj impianteve bërthamore iraniane, duke pretenduar se bombardimet kanë shkaktuar dëme masive në objektet ku dyshohet se ruhej materiali bërthamor.

“Kemi hedhur bomba dhe i gjithë mali u shemb mbi atë impiant. Në fillim thanë se askush nuk mund të arrinte më te pluhuri bërthamor, por unë dua ta kemi ne. Dua ta marrim uraniumin e pasuruar dhe do ta marrim”, deklaroi Trump.

Presidenti amerikan theksoi se SHBA nuk do të lejojë kurrë Iranin të pajiset me armë bërthamore dhe paralajmëroi pasoja të rënda nëse Teherani refuzon negociatat.

“Irani mund të bëjë një marrëveshje ose do të asgjësohet”, u shpreh ai, duke shtuar se marina iraniane është neutralizuar dhe se vendi nuk ka më kapacitete ajrore apo mbrojtje kundërajrore.

Gjatë vizitës në Pekin, Trump deklaroi gjithashtu se Shtetet e Bashkuara dhe Kina ndajnë të njëjtin qëndrim për krizën me Iranin. Në takimin me presidentin kinez Xi Jinping, ai tha se të dy vendet duan fundin e luftës dhe një Iran pa armë bërthamore.

“Ne duam që gjithçka të marrë fund. Nuk duam që Irani të ketë armë bërthamore dhe duam që Ngushtica e Hormuzit të mbetet e hapur”, deklaroi Trump.

Deklaratat e presidentit amerikan vijnë në një moment tensionesh të larta në Lindjen e Mesme, ndërsa komuniteti ndërkombëtar po ndjek me shqetësim zhvillimet mes Uashingtonit dhe Teheranit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)