Çfarë ndodh nëse Zvicra limiton popullsinë në 10 milionë?

Më 14 qershor, qytetarët zviceranë do të votojnë në një referendum të rëndësishëm që synon vendosjen e një kufiri maksimal prej 10 milionë banorësh në vend. Nisma ka ndarë opinionin publik pothuajse në dy pjesë të barabarta, 47% janë pro dhe 47% kundër.

Mbështetësit e projektit argumentojnë se rritja e popullsisë po ndikon në rritjen e qirave, mbingarkimin e infrastrukturës dhe presionin mbi shërbimet publike.

Sipas propozimit, para se vendi të arrijë shifrën 10 milionë banorë, do të aktivizohet një “fren emergjence”. Kjo do të sillte masa më të ashpra për emigracionin dhe azilin, kufizime për bashkimin familjar dhe rishikim të marrëveshjeve me Bashkimin Europian, përfshirë lëvizjen e lirë të personave.

Një nga skenarët më të diskutuar është rikthimi i kuotave për hyrjen e të huajve në Zvicër, ku lejet e qëndrimit do të jepeshin vetëm për persona me aftësi të veçanta, si mjekë apo specialistë të teknologjisë.

Madje është propozuar edhe një model i ngjashëm me atë australian, ku emigrantët vlerësohen sipas profesionit, moshës dhe njohjes së gjuhës, për të vendosur kush mund të hyjë në vend.

Nga ana tjetër, qeveria zvicerane dhe partitë kundër referendumit paralajmërojnë se masa të tilla mund të dëmtojnë ekonominë dhe marrëdhëniet me Bashkimin Europian. Ata propozojnë forcimin e ekonomisë dhe integrimit europian, si edhe prioritizimin e punësimit për qytetarët zviceranë.

Pavarësisht rezultatit të referendumit, të dyja palët bien dakord se Zvicra do të ndjekë politika më selektive për emigracionin, sidomos për qytetarët jashtë BE-së.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)