Rusia le pas armëpushim, dy ditë bombardime të ashpra në Ukrainë

Kievi është goditur nga një valë masive sulmesh ajrore ruse me dronë dhe raketa, vetëm një ditë pas përfundimit të një armëpushimi të shkurtër treditor.

Autoritetet ukrainase raportojnë të paktën 16 të vrarë, përfshirë dy fëmijë, ndërsa dhjetëra të tjerë janë të plagosur dhe rreth 20 persona rezultojnë ende të zhdukur nën rrënoja.

Sulmet ndodhën gjatë natës dhe goditën kryesisht zona banimi në kryeqytetin ukrainas. Një pallat 9-katësh në lagjen Darnytskyi u shkatërrua pjesërisht, ku ekipet e shpëtimit po vazhdojnë kërkimet mes rrënojave.

Shërbimet e emergjencës njoftuan se disa trupa janë nxjerrë nga ndërtesa e shembur, ndërsa numri i viktimave pritet të rritet.

Presidenti ukrainas Volodymyr Zelensky deklaroi se Rusia ka lëshuar mbi 670 dronë dhe 56 raketa në një nga sulmet më të mëdha që nga fillimi i pushtimit në vitin 2022. Sipas tij, më shumë se 180 objektiva janë goditur në të gjithë Ukrainën, përfshirë mbi 50 ndërtesa banimi.

Zelensky tha se pjesa më e madhe e dronëve u rrëzuan, por theksoi se raketat balistike mbeten kërcënimi kryesor dhe Ukraina ka mungesë të sistemeve mbrojtëse ajrore. Ai i bëri thirrje aleatëve për furnizim të menjëhershëm me sisteme antiraketë.

Sulmet vijnë menjëherë pas përfundimit të armëpushimit 3-ditor, i cili ishte ndërmjetësuar nga SHBA, por që të dy palët akuzuan njëra-tjetrën për shkelje. Që nga përfundimi i tij, Rusia ka rifilluar ofensivën ajrore, duke shkaktuar viktima për disa ditë radhazi.

Autoritetet ukrainase e kanë shpallur ditën e sotme ditë zie në Kiev, ndërsa ekipet e shpëtimit vazhdojnë punën mes rrënojave në kërkim të të mbijetuarve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)