Prostitucion, narkotikë dhe dhunë në familje, policia bën bilancin 24 orësh të punës

Strukturat e Policia e Shtetit kanë finalizuar 6 operacione policore gjatë 24 orëve të fundit, duke goditur raste të trafikimit të lëndëve narkotike, armëmbajtjes pa leje, mashtrimit dhe kapjes së personave në kërkim.

Sipas njoftimit zyrtar, tre operacione janë zhvilluar kundër veprimtarive kriminale të shpërndarjes së drogës, armëmbajtjes pa leje dhe mashtrimit, ku janë arrestuar 3 shtetas. Gjatë aksioneve janë sekuestruar lëndë narkotike të llojit kokainë, heroinë dhe cannabis sativa, një armë zjarri pistoletë, si dhe një shumë parash.

Po ashtu, tre operacione të tjera janë përqendruar në kapjen e personave të shpallur në kërkim. Njëri prej tyre kërkohej nga GJKKO si pjesë e një grupi kriminal në fushën e narkotikëve, ndërsa dy të tjerë akuzohen për vrasje të mbetur në tentativë dhe armëmbajtje pa leje. Ndërkohë, janë kapur edhe 6 persona të tjerë në kërkim për mashtrim kompjuterik dhe krime kundër personit apo pronës.

Në fushën e narkotikëve, policia ka evidentuar edhe 14 raste të tjera në të gjithë vendin, me 2 persona të arrestuar dhe 13 të proceduar në gjendje të lirë. Ndërkohë, për krime kundër personit janë regjistruar 17 raste, me 1 arrestim, 21 persona të proceduar dhe 5 të shpallur në kërkim.

Gjatë 24 orëve janë evidentuar edhe 8 raste të dhunës në familje, ku 2 autorë janë arrestuar dhe 6 të tjerë janë proceduar në gjendje të lirë. Gjithashtu janë plotësuar 9 kërkesë padi për urdhër mbrojtjeje.

Policia bën të ditur se janë evidentuar raste të krimeve ekonomiko-financiare, lojërave të fatit, krimeve kibernetike, prostitucionit dhe krimeve kundër mjedisit, ndërsa vijon puna për identifikimin e disa autorëve të dyshuar.

Në fushën e sigurisë rrugore, janë arrestuar 6 drejtues mjetesh për drejtim automjeti në gjendje të dehur ose pa leje drejtimi, ndërsa 5 të tjerë janë proceduar penalisht. Në të gjithë territorin janë regjistruar 5 aksidente rrugore, ku një person ka humbur jetën dhe 10 të tjerë janë plagosur, por ndodhen jashtë rrezikut për jetën.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)