Marta Kos mbërrin në Prishtinë, pritet nga ushtruesja e detyrës së presidentit

Komisionerja për Zgjerim e Bashkimi Evropian, Marta Kos nisi vizitën e saj të parë në Kosovë që prej marrjes së detyrës në Komisionin Evropian në dhjetor të vitit 2024.

Gjatë qëndrimit në Kosovë, Kos u prit nga ushtruesja e detyrës së presidentit, Albulena Haxhiu, ndërsa në vijim pritet të zhvillojë takim edhe me kryeministrin në detyrë, Albin Kurti.

Megjithëse agjenda zyrtare e takimeve nuk është bërë publike, fokusi kryesor i vizitës pritet të jetë procesi i reformave që lidhen me Planin e Rritjes së Bashkimit Evropian për Ballkanin Perëndimor dhe përfitimet që Kosova mund të marrë nga kjo paketë financiare.

Vizita e komisioneres evropiane vjen në një moment të ndjeshëm politik për Kosovën, pas krizës institucionale dhe shpërndarjes së Kuvendit më 28 prill. Më herët, një vizitë e planifikuar për muajin mars ishte anuluar pas vendimit për shpërndarjen e legjislaturës.

Megjithatë, zyrtarë evropianë kanë vlerësuar se dialogu me institucionet e Kosovës duhet të vazhdojë pavarësisht situatës politike, duke e konsideruar të rëndësishëm vijimin e reformave në kuadër të integrimit evropian.

Në fund të muajit prill, Marta Kos deklaroi në Parlamentin Evropian se Bashkimi Evropian kishte hequr masat ndaj Kosovës dhe priste që autoritetet në Prishtinë të vijonin reformat për të përfituar nga mbështetja financiare e BE-së.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)