Dhuna ndaj kreut të degës së VV, policia arreston 2 persona, Sami Lushtaku nuk paraqitet

Ndërkohë, sipas prokurorisë, i akuzuari kryesor për këtë ngjarje, Sami Lushtaku nuk është paraqitur ende për të dhënë versionin e tij për këtë ngjarje.

Burimi: Telegrafi

15.05.2026. 07:25

Dhuna ndaj kreut të degës së VV, policia arreston 2 persona, Sami Lushtaku nuk paraqitet

Policia e Kosovës bën me dije se ka ndaluar dy persona në lidhje me sulmin e rëndë ndaj kreut të Lëvizjes Vetëvendosje në Skënderaj, Hysni Mehani.

Sipas autoriteteve të ndaluarit janë shtetasit E.L dhe B.N të cilët do të qëndrojnë në arrest për 48 orë, të dyshuar për kryerjen e veprës penale “Lëndimi i lehtë trupor”.

Ndërkohë, sipas prokurorisë, i akuzuari kryesor për këtë ngjarje, Sami Lushtaku nuk është paraqitur ende për të dhënë versionin e tij për këtë ngjarje në kulmin e fushatës elektorale.

Hysni Mehani, kryetar i VV-së në Skënderaj dhe zëvendësministër i Financave, deklaroi se është sulmuar fizikisht nga kreu i komunës Sami Lushtaku dhe personat që e shoqëronin atë. Përmes një reagimi në rrjetet sociale, Mehani tha se gjatë incidentit i është marrë edhe telefoni personal.

“Të dashur miq, jam sulmuar nga Sami Lushtaku dhe banda e tij. Telefonin personal ma kanë marrë. Lus Policinë të mbrojë familjen time dhe ftoj familjarët për përmbajtje”, shkroi ai.

Pas reagimit të Mehanit, edhe Lëvizja Vetëvendosje publikoi një fotografi ku ai shfaqet i lënduar dhe me gjak në fytyrë, duke e cilësuar ngjarjen si një “sulm brutal dhe banditesk”.

Sipas versionit të VV-së, Mehani ndodhej në kafenenë “Solo” së bashku me deputeten Arjeta Fejza dhe disa aktivistë të partisë, kur fillimisht është goditur me grusht dhe më pas me gotë në kokë.

Partia e drejtuar nga kryeministri në detyrë, Albin Kurti pretendon se gjatë përplasjes është sulmuar edhe sekretari i degës së VV-së në Skënderaj, Bahri Zabeli, teksa tentonte të ndalte eskalimin e situatës.

“Fillimisht, Hysni Mehani është goditur me grusht, ndërsa më pas edhe me gotë në kokë. Pas përpjekjes së Sekretarit të Qendrës, Bahri Zabeli, për të parandaluar përshkallëzimin, ai është sulmuar dhunshëm nga shoqëruesit e Sami Lushtakut”, thuhet në reagimin e VV-së.

VV kërkon reagim urgjent nga organet e drejtësisë dhe distancim të Partisë Demokratike të Kosovës nga ngjarja.

Në anën tjetër, Sami Lushtaku e mohoi versionin e Vetëvendosjes dhe pretendoi se vetë ai ishte objektiv i një provokimi politik të organizuar nga pushteti qendror. “Pushteti i Albin Kurtit përmes mekanizmave të tij tentoi që sot të më sulmojë në Skënderaj”, deklaroi Lushtaku.

Shkarkoni aplikacionin Newsmax Balkans:

Komente (0)