Shefi i CIA shkon në Kubë me pakon 100 mln USD, Havana: Nuk jemi kërcënim për SHBA

Drejtori i CIA-s, John Ratcliffe, zhvilloi një vizitë të pazakontë në Havana, ku u takua me drejtues të Ministrisë së Brendshme kubane dhe shërbimeve sekrete të vendit. Takimi vjen në një moment tensionesh të larta mes SHBA-së dhe Kubës, ndërsa administrata e Donald Trump ka rikthyer ofertën për 100 milionë dollarë ndihmë humanitare për popullin kuban.

Sipas deklaratës së autoriteteve kubane, bisedimet synonin përmirësimin e dialogut mes dy vendeve dhe Havana theksoi se Kuba “nuk përbën kërcënim për sigurinë kombëtare të SHBA-së”.

Nga ana tjetër, një zyrtar i CIA-s deklaroi se Uashingtoni është i gatshëm të diskutojë për çështje ekonomike dhe sigurie vetëm nëse Kuba bën ndryshime themelore.

Vizita ndodh në kohën kur Kuba po përjeton një krizë të rëndë energjetike. Bllokada amerikane ndaj furnizimit me naftë ka sjellë mungesa të mëdha karburanti, ndërprerje masive të energjisë elektrike dhe paralizim të shërbimeve publike. Spitalet po funksionojnë me vështirësi, ndërsa disa shkolla dhe zyra shtetërore janë mbyllur.

Ministri kuban i Energjisë paralajmëroi se vendi ka mbetur pothuajse pa karburant. Në Havana dhe qytete të tjera kanë shpërthyer protesta kundër mungesës së energjisë, ku qytetarët dolën në rrugë.

Presidenti kuban Miguel Díaz-Canel akuzoi SHBA-në për përkeqësimin e situatës, duke e quajtur politikën amerikane një bllokadë energjetike gjenocidale.

Ndërkohë, SHBA kërkon që ndihma humanitare të shpërndahet përmes Kishës Katolike dhe organizatave të pavarura, duke anashkaluar qeverinë kubane. Havana ka deklaruar se nuk refuzon ndihmën ndërkombëtare, por kërkon që Uashingtoni të lehtësojë sanksionet ekonomike dhe tregtare që, sipas saj, po e çojnë vendin drejt kolapsit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)