Studentët shqiptarë caktojnë protestën e radhës në Shkup

Studentët shqiptarë të Fakulteteve Juridike nga Universiteti i Tetovës, Universiteti “Nënë Tereza” dhe Universiteti i Evropës Juglindore kanë paralajmëruar protestën e dytë radhazi në Shkup, në mbrojtje të përdorimit të gjuhës shqipe në provimin e jurisprudencës.

Përmes një njoftimi publik, studentët kanë bërë thirrje për mobilizim qytetar, duke caktuar protestën më 18 maj, në ora 16:30, para Urës së Gurit në Shkup.

“Mos mungo, dil mbroje gjuhën!”, thuhet në thirrjen e shpërndarë nga organizatorët, të cilët kërkojnë mbështetje të gjerë qytetare për kauzën e tyre.

Protestat kanë nisur pas kundërshtimeve të studentëve ndaj faktit që provimi i jurisprudencës, i domosdoshëm për ushtrimin e profesioneve juridike si avokat, gjyqtar apo prokuror, vazhdon të zhvillohet kryesisht në gjuhën maqedonase, edhe pse gjuha shqipe ka status zyrtar në Maqedoninë e Veriut.

Studentët kërkojnë zbatim të plotë të Ligjit për përdorimin e gjuhëve dhe të drejtën për ta dhënë provimin në gjuhën shqipe, gjuhë në të cilën kanë ndjekur edhe studimet universitare. Ata e konsiderojnë këtë çështje si një të drejtë kushtetuese dhe jo si kërkesë politike.

Në protestat e mëparshme në Shkup, studentët kanë mbajtur pankarta me slogane si “Gjuha shqipe nuk negociohet” dhe “Ligji në letër, diskriminim në praktikë”, ndërsa kanë kërkuar edhe reagim institucional nga Ministria e Drejtësisë.

Organizatorët kanë paralajmëruar se protestat dhe debatet studentore do të vazhdojnë edhe në qytete të tjera deri në plotësimin e kërkesave të tyre.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)