Vjosa Osmani fut në listën e kandidatëve dhe ish-deputetin e PD

Ish-Presidentja e Kosovës, Vjosa Osmani ka njoftuar në rrjetet sociale përfshirjen e Kreshnik Çollakut në listën e kandidatëve për deputetë të LDK për zgjedhjet e ardhshme.

Sipas Osmanit, Çollaku përfaqëson një figurë me përvojë të gjatë në fushën universitare dhe politike, me mbi 20 vite angazhim si pedagog, ku ka formuar breza studentësh me frymë demokratike dhe orientim euro-atlantik.

Osmani e cilësoi atë si një figurë që ka ruajtur lidhje të ngushta me Kosovën dhe që aktualisht shërben edhe si këshilltar për politikën e jashtme, duke ndihmuar në forcimin e marrëdhënieve me Shtetet e Bashkuara të Amerikës.

“Sot, bashkë me Lumirin, kemi kënaqësinë të prezantojmë Kreshnik Çollakun si pjesë të rrugëtimit tonë politik.

Niku e ka lidhur angazhimin e tij me mbështetjen e Kosovës, demokracisë dhe orientimit euro-atlantik të shqiptarëve.

Për më shumë se 20 vite si pedagog universitar, ai ka formuar breza studentësh me frymën e mendimit demokratik, përgjegjësisë publike dhe vizionit perëndimor.

Në periudhat më të rëndësishme të konsolidimit ndërkombëtar të Kosovës, ai ka shërbyer në Ambasadën e Shqipërisë në Ëashington, duke kontribuar në forcimin e mbështetjes amerikane për Kosovën dhe promovimin e çështjes së saj në qarqet diplomatike amerikane.

Si deputet i Partisë Demokratike të Shqipërisë dhe pjesë aktive e diplomacisë parlamentare, ai ka qenë një zë i fuqishëm në mbështetje të Kosovës në forume rajonale dhe ndërkombëtare, duke mbrojtur të drejtën e saj për pavarësi, sovranitet, integritet territorial dhe integrim euro-atlantik.

Kreshnik Çollaku është gjithashtu një nga themeluesit e Lëvizjes Studentore të Dhjetorit 1990, brezi që rrëzoi diktaturën komuniste dhe e lidhi fatin e shqiptarëve me demokracinë dhe Perëndimin.

Mbi të gjitha, ai ka ruajtur gjithmonë një lidhje të veçantë me Kosovën, me njerëzit dhe të ardhmen e saj. Sot, ai është edhe shtetas krenar i Republikës së Kosovës dhe si këshilltar i imi për politikë të jashtme në Presidencë ka dhënë një kontribut të vyer në hapjen e dyerve të Kosovës me botën e në veçanti në thellimin e raporteve me SHBA.

Ne besojmë se Kuvendi i Kosovës ka nevojë për njerëz me përvojë, integritet dhe vizion, dhe te Kreshnik Çollaku do ta gjejnë një të tillë.

Mirë se vjen Kreshnik e na priftë e mbara në këtë rrugëtim vendimtar!”, shkruan Vjosa Osmani.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)