Putin e propozoi si negociator për paqen me Ukrainën, BE refuzon Schroder: I lidhur me kompani ruse

Bashkimi Evropian ka hedhur poshtë idenë e presidentit rus Vladimir Putin që ish-kancelari gjerman Gerhard Schröder të shërbejë si ndërmjetës evropian në bisedimet e paqes për luftën në Ukrainë.

Shefja e diplomacisë së BE, Kaja Kallas, deklaroi në Bruksel se do të ishte e paarsyeshme që Rusia të ketë ndikim në zgjedhjen e një negociatori për Evropën. Ajo theksoi se Schröder nuk mund të konsiderohet i paanshëm për shkak të lidhjeve të tij të mëparshme me kompani shtetërore ruse dhe projekte energjetike si Nord Stream dhe Rosneft.

Schröder ka qenë prej vitesh një figurë e diskutueshme në Evropë për afërsinë e tij me Kremlinin dhe ka shmangur dënimin e hapur të luftës në Ukrainë pas pushtimit rus në 2022.

Nga ana tjetër, Putin ka sugjeruar se konflikti mund të jetë drejt përfundimit, por kërkon që Ukraina të tërheqë trupat nga Donbasi si kusht për negociata, një kërkesë e refuzuar nga Kievi.

Ministri gjerman i Mbrojtjes, Boris Pistorius, i quajti deklaratat e Putinit të dyshimta dhe pjesë të një strategjie për të krijuar presion politik dhe për të fshehur dobësitë e Rusisë në frontin ushtarak.

Në këtë kontekst, perspektiva e një roli të Schröderit në negociata është praktikisht e përjashtuar, ndërsa lufta në Ukrainë vazhdon pa shenja të qarta për një zgjidhje të afërt.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)