Operacion i madh në Turqi, mbi 300 persona arrestohen për lidhje me ISIS

Autoritetet në Turqi kanë arrestuar 324 persona të dyshuar për lidhje me organizatën terroriste ISIS gjatë një operacioni të gjerë të zhvilluar në dhjetëra provinca të vendit.

Ministria e Brendshme turke bëri të ditur se aksioni u zhvillua në 47 provinca, ndërsa mes të arrestuarve ka persona të dyshuar për financimin e ISIS-it, si dhe individë që dyshohet se kanë qenë aktivë në radhët e organizatës terroriste.

“Në funksion të paqes, unitetit dhe solidaritetit të kombit tonë, ne vazhdojmë operacionet pa ndërprerje, ditë e natë, 365 ditë në vit”, thuhet në deklaratën e ministrisë.

Autoritetet nuk kanë bërë publike identitetet apo shtetësitë e të arrestuarve.

Turqia ka zhvilluar edhe më herët operacione të ngjashme kundër ISIS-it, organizatë që ka kryer disa sulme të përgjakshme në territorin turk. Një nga atentatet më të rënda ndodhi në natën e Vitit të Ri 2017, kur një sulm në një klub nate në Stamboll la 39 persona të vrarë.

Në dhjetor të vitit të kaluar, tre policë dhe gjashtë ekstremistë humbën jetën gjatë një përplasjeje të armatosur mes forcave turke dhe anëtarëve të ISIS-it në veriperëndim të vendit.

Ndërsa muajin e kaluar, tre persona të armatosur hapën zjarr ndaj policisë pranë konsullatës së Izrael në Stamboll, ku një prej sulmuesve u vra gjatë shkëmbimit të zjarrit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)