Çmimet e prodhimit në SHBA shënojnë rritjen më të madhe në katër vitet e fundit, sinjal për përshpejtim të inflacionit

Çmimet e prodhimit në Shtetet e Bashkuara kanë shënuar një rritje më të fortë se sa pritej gjatë muajit prill, duke regjistruar rritjen më të lartë që nga fillimi i vitit 2022. Të dhënat sinjalizojnë një përshpejtim të inflacionit në një moment pasigurie ekonomike dhe tensioni gjeopolitik. Sipas të dhënave të publikuara nga Byroja e Statistikave të Punës në Departamentin e Punës në SHBA, indeksi i çmimeve të prodhimit për kërkesën finale u rrit me 1.4% në prill, pas një rritjeje të rishikuar në 0.7% në muajin mars.

Ekonomistët ndërkohë kishin parashikuar një rritje më të moderuar prej rreth 0.5%. Rritja e fundit është më e forta që prej marsit 2022 dhe ka prekur si çmimet e mallrave, ashtu edhe ato të shërbimeve. Gjatë këtij viti, presionet mbi çmimet janë shtuar edhe për shkak të kostove më të larta të energjisë, në një klimë të tensionuar ndërkombëtare të lidhur me konfliktin në rajonin e Iran dhe ndikimin e tij në zinxhirët globalë të furnizimit.

Në bazë vjetore, indeksi i çmimeve të prodhimit u rrit me 6%, niveli më i lartë që nga fundi i vitit 2022, duke sinjalizuar një zgjerim të presioneve inflacioniste në ekonomi. Rritja e inflacionit po shihet si një sfidë e shtuar për politikën monetare të Rezervës Federale, e cila synon ta mbajë inflacionin pranë objektivit prej 2%. Ndërkohë, edhe indeksi i çmimeve të konsumit është rritur në prill, duke forcuar pritshmëritë për një fazë më të vështirë të kontrollit të çmimeve në ekonominë amerikane.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)