Palestër, socializim dhe dhomat e takimit me vizitorët: Pamjet nga paraburgimi ku mbahen ish-krerët e UÇK-së

Dhomat e Specializuara të Kosovës në Hagë kanë publikuar për herë të parë pamje nga brenda qendrës së paraburgimit ku po mbahen ish-krerët e Ushtrisë Çlirimtare të Kosovës, duke përfshirë Hashim Thaçin, Rexhep Selimin, Kadri Veselin dhe Jakup Krasniqin. Në videon e publikuar, shfaqen ambientet e përditshme ku të paraburgosurit kalojnë kohën, duke përfshirë palestrën, hapësirat e qëndrimit ditor, zonat për socializim, si dhe dhomat ku zhvillohen takimet me familjarët dhe vizitorët.

Gjithashtu, në pamje shihen edhe hapësirat e jashtme për ajrim dhe aktivitet fizik. Sipas njoftimit zyrtar, të paraburgosurit kanë të drejtë të marrin pjesë edhe në shërbesa fetare gjatë qëndrimit në qendrën e paraburgimit në Hagë. Dhomat e Specializuara theksojnë se masa e paraburgimit vendoset vetëm në raste të domosdoshme për zhvillimin e procesit gjyqësor, veçanërisht kur vlerësohet se ekziston rreziku i ndikimit mbi dëshmitarët apo pengimit të procedurave.

Foto nga video

“Të pandehurit që janë të paraburgosur para ose gjatë gjyqit të tyre në Dhomat e Specializuara të Kosovës mbahen në Qendrën e Paraburgimit në Hagë. Atje, ata kanë qasje në ajër të pastër dhe ushtrime, mund të shoqërohen, të presin vizitorë dhe të marrin pjesë në shërbesa fetare. Paraburgimi para ose gjatë një gjyqi bëhet vetëm kur është e nevojshme për të parandaluar një rrezik të konsiderueshëm, p.sh. rreziku që i pandehuri të përpiqet të frikësojë ose të ndikojë në dëshmitarë. Çdo dy muaj, Gjyqtarët e Gjyqit të Specializuar të Kosovës do të rishikojnë paraburgimin për të shqyrtuar nëse paraburgimi është ende i nevojshëm dhe i arsyeshëm”, thuhet në njoftim.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)