Marta Kos në Kosovë më 15 maj, vizita e parë si Komisionere për Zgjerim

Komisionerja e Bashkimit Evropian për Zgjerim Marta Kos pritet të vizitojë Kosovën më 15 maj, në atë që do të jetë vizita e saj e parë zyrtare në vend që prej marrjes së detyrës në Komisionin Evropian.

Sipas burimeve jozyrtare nga institucionet evropiane, vizita ende nuk është konfirmuar zyrtarisht, por pritet të bëhet publike në ditët në vijim.

Gjatë mandatit të saj, ajo ka vizituar të gjitha vendet e përfshira në procesin e zgjerimit të Bashkimit Evropian në Ballkanin Perëndimor dhe në Partneritetin Lindor, disa prej tyre më shumë se një herë.

Mungesa e vizitës në Kosovë gjatë vitit 2025 është lidhur nga zyrtarët evropianë me krizën politike dhe mungesën e institucioneve funksionale në vend.

Fillimisht, një vizitë në Prishtinë ishte planifikuar për 12 mars, por ajo u anulua pas shpërndarjes së Kuvendit të Kosovës më 6 mars nga ish-presidentja Vjosa Osmani.

Sipas burimeve në Bruksel, tani vlerësohet se vizita duhet të realizohet pavarësisht situatës politike, ndërsa pritet që ajo të fokusohet në reformat e lidhura me Planin e Rritjes së Bashkimit Evropian për Ballkanin Perëndimor.

Në fund të prillit, Kos deklaroi në Parlamentin Evropian se synon të vizitojë së shpejti Prishtinën për të diskutuar zbatimin e reformave dhe përfitimin e mbështetjes financiare të BE-së.

Kosova ka përfituar së fundmi 61.8 milionë euro parafinancim nga BE në kuadër të Planit të Rritjes, ndërsa për periudhën 2024–2027 i janë ndarë rreth 882 milionë euro, pjesërisht grante dhe pjesërisht kredi.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)