Stuhia godet rajonin, borë në Kroaci, erë e fortë dhe breshër në Bosnje

Në prag të nisjes së sezonit veror, temperaturat në Zagreb ranë me më shumë se 11 gradë Celcius, vetëm për një orë, ndërsa një stuhi e fortë goditi kryeqytetin kroat dhe disa rajonte të tjera të vendit.

Stuhia goditi Zagrebin, periferitë e kryeqytetit, Krapina-Zagorje dhe Sisak-Moslavina. Po ashtu era e fortë, shiu dhe breshëri çuan në qindra telefonata për ndihmë nga qytetarët në Qendrën e Qarkut të Zagrebit, raporton  Index.hr.

Sipas të dhënave të Drejtorisë së Mbrojtjes Civile, pati rreth 250 raportime, dhe qytetarët raportuan pemë të rrëzuara në rrugë, çati të dëmtuara të ndërtesave banesore dhe tregtare, si dhe zjarre në papafingo të shtëpive individuale.

Era e fortë shkaktoi probleme serioze edhe në trafikun e qytetit, i cili u ndërpre për një kohë të shkurtër. Mediat raportojnë se era rrëzoi çatinë e ndërtesës së kompanisë Pliva, e cila përfundoi në linjën hekurudhore, duke e komplikuar më tej situatën në qytet.

Numri më i madh i ndërhyrjeve u regjistrua në qendër të Zagrebit, veçanërisht në zonën e Tushkanac, ku një person u plagos lehtë pasi një degë ra, raporton Jutarnji. Stuhia solli edhe një ndryshim të menjëhershëm të motit, dhe në disa pjesë të qytetit pati breshër, ndërsa në malin Sljeme mbi Zagreb ra borë.

Meteorologët njoftojnë një stabilizim gradual të motit në orët në vijim, por edhe mundësinë e reshjeve të herëpashershme dhe erës së fortë, ndërsa stuhia e fortë ka prekur edhe Bosnjën.

Dëmet më të mëdha kanë ndodhur në territoret e Republikës Srpska, më saktësisht në zonën e Gradishkës, Kostajnicës, Prijedorit dhe Kozarska Dubicës.

Era e fortë shkaktoi dëme në ndërtesa, ndërtesa publike dhe parqe, ndërsa një numër i madh pemësh u thyen.  

Meteorologët parashikojnë gjithashtu mot të paqëndrueshëm në ditët në vijim, me mundësinë e reshjeve të reja të shiut, bubullimave dhe një rënie të ndjeshme të temperaturës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)