KQZ certifikon koalicionet për zgjedhjet e 7 qershorit në Kosovë, dy subjekte mbeten jashtë garës

Procesi për zgjedhjet e parakohshme parlamentare të 7 qershorit në Kosova ka hyrë në një tjetër fazë, pasi Komisioni Qendror i Zgjedhjeve ka certifikuar disa prej subjekteve politike që do të marrin pjesë në garë.

KQZ bëri të ditur se ka miratuar certifikimin e katër subjekteve të reja politike, përkatësisht tre koalicioneve dhe një kandidati të pavarur, të cilët plotësuan kriteret ligjore të përcaktuara për pjesëmarrje në zgjedhje.

Mes koalicioneve të certifikuara është edhe ai me emrin Lëvizja VETËVENDOSJE!, i përbërë nga Lëvizja VETËVENDOSJE!, Guxo, Alternativa dhe Partia Shqiptare Demokristiane. Gjithashtu u certifikuan koalicioni “Koalicija Vakat”, i përbërë nga dy parti boshnjake, si dhe koalicioni “ASHKALITË E BASHKUAR”, ku bëjnë pjesë tri subjekte politike të komunitetit ashkali.

KQZ certifikoi edhe kandidatin e pavarur Esmir Kasi.

Ndërkohë, dy subjekte politike nuk arritën të marrin miratimin për pjesëmarrje në zgjedhje. Sipas KQZ-së, nisma qytetare “Složno Pobeđujemo” dhe partia SDA-Stranka Demokratske Akcije nuk plotësuan kriterin ligjor për numrin minimal të nënshkrimeve të nevojshme gjatë aplikimit për certifikim.

Institucioni zgjedhor sqaroi se legjislacioni kërkon dorëzimin e të paktën 1 mijë nënshkrimeve mbështetëse për subjektet që aplikojnë për certifikim, kriter që këto dy subjekte nuk e kanë përmbushur.

Pas vendimeve të fundit, në zgjedhjet e parakohshme parlamentare në Kosovë do të garojnë gjithsej 3 koalicione, 17 parti politike dhe 1 kandidat i pavarur.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)