Mungesa e gjumit dhe gjumi i tepërt përshpejtojnë plakjen biologjike

Një studim i ri i publikuar në revistën shkencore Nature ka zbuluar se si mungesa e gjumit, ashtu edhe gjumi i tepërt mund të lidhen me përshpejtimin e plakjes biologjike të organizmit. Sipas studiuesve, ndikimi vërehet në organe të rëndësishme si truri, zemra, mushkëritë dhe sistemi imunitar.

Studimi u drejtua nga Junhao Wen, profesor i radiologjisë në Columbia University Vagelos College of Physicians and Surgeons dhe u bazua në analizën e të dhënave të afro gjysmë milioni personave nga databaza “Biobank”.

Shkencëtarët përdorën inteligjencën artificiale dhe metoda të avancuara të të mësuarit makinerik për të vlerësuar moshën biologjike të trupit përmes analizës së 17 sistemeve të ndryshme organike. Në studim u përfshinë skanime mjekësore, proteina dhe molekula të marra nga analizat e gjakut.

Rezultatet treguan një model në formë “U”, ku si personat që flinin më pak se gjashtë orë në ditë, ashtu edhe ata që flinin më shumë se tetë orë, kishin shenja më të theksuara të plakjes biologjike.

Sipas studiuesve, rezultatet më të mira u vunë re tek personat që flinin mesatarisht nga 6.4 deri në 7.8 orë në natë. Pikërisht ky interval u lidh me nivelin më të ulët të plakjes së përshpejtuar të organeve.

Autorët e studimit theksojnë se gjatësia e gjumit nuk është domosdoshmërisht shkaku i drejtpërdrejtë i plakjes më të shpejtë, por mund të jetë një tregues i problemeve të përgjithshme shëndetësore.

Studimi evidentoi gjithashtu lidhje të forta mes gjumit të shkurtër dhe problemeve si depresioni, ankthi, obeziteti, diabeti i tipit 2, hipertensioni dhe sëmundjet e zemrës.

Ndërkohë, si gjumi i pakët ashtu edhe ai i tepërt u lidhën me sëmundje kronike të mushkërive, astmën dhe çrregullime të sistemit tretës, përfshirë gastritin dhe refluksin gastroezofageal.

Studiuesit analizuan edhe ndikimin e gjumit në depresionin në moshë të avancuar, duke arritur në përfundimin se mungesa e gjumit mund të ndikojë drejtpërdrejt në rëndimin e sëmundjeve, ndërsa gjumi i tepërt mund të lidhet me ndryshime biologjike të lidhura me depresionin.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)