Turistët “mbeten thatë”, Bahamasi ndalon alkoolin sepse ka zgjedhje

Një vendim i papritur në Bahamas ka shkaktuar reagime të forta nga turistët, pasi autoritetet kanë ndaluar përkohësisht shitjen e alkoolit në të gjithë vendin gjatë periudhës së zgjedhjeve të përgjithshme.

Sipas vendimit, i cili lidhet me zgjedhjet që do të mbahen më 12 maj, ndalohet shitja e pijeve alkoolike në bare, restorante, plazhe private dhe të gjitha zonat turistike, përfshirë edhe ishujt privatë. Masa është marrë në kuadër të ligjeve për sigurinë dhe rendin gjatë procesit zgjedhor.

Qeveria ka sqaruar se kufizimi vlen për të gjithë territorin e vendit dhe nuk përjashton as zonat turistike, pavarësisht përpjekjeve të operatorëve turistikë për të siguruar lehtësime.

Kompania e lundrimeve “Royal Caribbean” ka njoftuar pasagjerët e saj se është e detyruar të zbatojë rregullat lokale, duke theksuar se ndalimi nuk mund të anashkalohet në portet e Bahamas.

Vendimi ka shkaktuar pakënaqësi mes turistëve, veçanërisht atyre që kishin planifikuar festa apo udhëtime speciale. Disa prej tyre e kanë quajtur masën “të papritur dhe zhgënjyese”, duke thënë se nuk ishin njoftuar më herët për kufizimet.

Megjithatë, ekziston një përjashtim i pjesshëm: ndalimi zbatohet vetëm në tokë. Kjo do të thotë se turistët mund të konsumojnë alkool normalisht në bordet e anijeve turistike, ku vlejnë rregulloret e kompanive dhe jo ligji zgjedhor i vendit.

Autoritetet në Bahamas nuk kanë dhënë shenja se masa do të zbutet, ndërsa ajo mbetet në fuqi deri në përfundimin e procesit zgjedhor.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)