Interi fiton Kupën e Italisë dhe kompleton “dopietën”

Interi ka fituar për herë të 10-të në histori Kupën e Italisë, pasi mposhti 2-0 Lazion në finalen e zhvilluar në stadiumin “Olimpico”.

Me këtë sukses, zikaltërit siguruan edhe “dopietën” sezonale, duke fituar kampionatin dhe Kupën e Italisë në të njëjtin edicion për herë të parë që nga viti 2010.

Inter e nisi ndeshjen në kontroll total dhe gjeti avantazhin që në minutën e 14-të. Pas një goditjeje këndi të Federico Dimarcos, topi u devijua nga Adam Marusic dhe përfundoi në rrjetën e Lazios.

Skuadra nga Roma tentoi të reagojë, por hasi vështirësi përballë presionit të vazhdueshëm të Interit. Pikërisht nga një gabim i Lazios erdhi edhe goli i dytë. Denzel Dumfries fitoi topin në krahun e djathtë dhe shërbeu për Lautaro Martínez, i cili nuk gaboi përballë portës.

Në pjesën e dytë, Lazio provoi të rikthehej në lojë dhe iu afrua golit me Tijjani Noslin, por tentativa e tij shkoi ngjitur me shtyllën. Edhe Inter pati raste të tjera për të thelluar rezultatin, ndërsa portieri Josep Martínez u tregua vendimtar në momentet kur Lazio tentoi të rihapte finalen.

Ky triumf konfirmon sezonin e shkëlqyer të Interit nën drejtimin e trajnerit Cristian Chivu, i cili në sezonin e tij të parë në stol arriti të rikthejë klubin në majën e futbollit italian.

Ndërkohë, Lazio humbi mundësinë e fundit për të siguruar një vend në kompeticionet europiane për sezonin e ardhshëm.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)