Kriza te Milani pas humbjes me Atalantën, Furlani mbledh klubin dhe “bllokon” skuadrën në Milanello

Humbja ndaj Atalantës dhe protestat e ashpra të tifozëve në “San Siro” kanë shkaktuar tension të madh te Milani, me drejtuesit që kanë ndërmarrë masa urgjente për të bashkuar skuadrën në fundin vendimtar të sezonit.

Administratori i deleguar i klubit, Giorgio Furlani, zhvilloi një mbledhje në “Casa Milan” me drejtuesit dhe stafin e klubit për të kërkuar më shumë unitet dhe besim pas rezultateve negative.

Sipas mediave italiane, gjatë takimit u diskutua situata e skuadrës dhe objektivi për të siguruar një vend në Ligën e Kampioneve, ndërsa u vendos që ekipi të futet në grumbullim në Milanello duke nisur nga dita e mërkurë.

Mesazhi i drejtuesve ishte që të gjithë duhet të punojnë në të njëjtin drejtim për të kaluar momentin e vështirë dhe për të shpëtuar sezonin.

Protestat e tifozëve para dhe pas ndeshjes me Atalantën kanë lënë gjurmë te drejtuesit kuqezi, të cilët nuk e kanë nënvlerësuar reagimin e ashpër të publikut. Për këtë arsye, Furlani mblodhi drejtuesit e sektorëve të ndryshëm të klubit, përfshirë edhe Igli Taren, i cili drejton sektorin sportiv.

Në takim nuk ishte trajneri Massimiliano Allegri, por mediat raportojnë se ai ka pasur kontakte me drejtuesit pas diskutimit të zhvilluar një natë më parë në “San Siro”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)