VIDEO/ Futbollisti goditi kundërshtarin me bërryl, dënohet me burg

Një futbollist amator në Britaninë e Madhe është dënuar me burg pasi goditi me bërryl në fytyrë një kundërshtar gjatë një ndeshjeje, incident që u bë viral në rrjetet sociale.

Thomas Taylor, 36 vjeç, po luante për ekipin Trearddur Bay kundër Porthmadog kur goditi papritur lojtarin Daniel Brookwell gjatë një momenti në zonë. Pamjet treguan Brookwell duke rënë pa ndjenja në fushë pas goditjes së fortë.

Sipas viktimës, ai nuk e kuptoi menjëherë çfarë kishte ndodhur dhe u zgjua i gjakosur në fytyrë.

“Nuk e kuptova që isha në tokë deri pas disa sekondash”, deklaroi Brookwell, duke shtuar se ngjarja i kishte hequr besimin dhe kënaqësinë për të luajtur futboll.

Taylor pretendoi se ishte provokuar dhe se kundërshtari e kishte kërcënuar gjatë ndeshjes, por prokuroria e hodhi poshtë këtë version, duke e cilësuar sulmin si të qëllimshëm.

Gjykata në Uells dëgjoi se futbollisti ishte ndëshkuar më herët gjatë ndeshjes edhe për protesta ndaj arbitrit. Ai pranoi fajësinë për sulm që shkaktoi dëmtime fizike.

Avokati mbrojtës deklaroi se Taylor vuante nga diabeti dhe se niveli i sheqerit në gjak, së bashku me tensionin e ndeshjes, mund të kishin ndikuar në sjelljen e tij.

Gjykata vendosi një dënim prej 24 javësh burg, të pezulluar për një vit. Ai duhet gjithashtu të paguajë 200 paund dëmshpërblim, si dhe shpenzimet gjyqësore.

Pas incidentit, klubi Trearddur Bay njoftoi largimin e menjëhershëm të lojtarit, duke deklaruar se nuk toleron dhunën në asnjë formë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)