Botërori 2026, FIFA ashpërson masat: Arbitrat më të rreptë ndaj mbajtjeve dhe përplasjeve në zonë

FIFA po shqyrton forcimin e kompetencave të arbitrave përpara Kupës së Botës 2026, me synimin për të luftuar mbajtjet dhe rrëmujat në zonën e rreptësisë, sidomos gjatë goditjeve standarde. Sipas raportimeve të gazetës britanike “The Times”, drejtuesit e sektorit të arbitrimit po diskutojnë masa më të ashpra ndaj skuadrave që përdorin bllokime dhe faulle taktike para ekzekutimit të goditjeve nga këndi apo goditjeve të lira.

Një nga propozimet më të rëndësishme është që skuadra sulmuese të përfitojë një goditje dënimi në rastet kur një goditje këndi “neutralizohet” nga një faull i kryer përpara ekzekutimit të saj. Qasja e re synon të sjellë më shumë rregull në situatat kaotike brenda zonës, ndërsa FIFA u ka komunikuar tashmë trajnerëve të 48 kombëtareve pjesëmarrëse se arbitrat do të zbatojnë një linjë shumë më të ashpër gjatë turneut.

Ndërkohë, Bordi Ndërkombëtar i Federatave të Futbollit, institucioni përgjegjës për ndryshimet në rregullore, pritet ta trajtojë këtë çështje në plan afatgjatë. Megjithatë, ndryshime zyrtare në rregullore nuk mund të hyjnë në fuqi përpara nisjes së Botërorit. Pavarësisht kësaj, FIFA kërkon të ndërhyjë që tani për të shmangur polemikat dhe episodet kontroverse gjatë fazës finale të Kupës së Botës 2026.

Trajnerëve u janë dhënë gjithashtu udhëzime të qarta mbi interpretimin që arbitrat do të zbatojnë. Ata do të jenë më pak tolerantë ndaj bllokimeve të portierit dhe pritet të ketë më shumë ndëshkime për përplasjet në zonë gjatë goditjeve standarde.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)