Si teknologjia e Formula 1 ndihmoi mjekët të shpëtonin mijëra fëmijë

Ajo që nisi si një ide e pazakontë në vitet ’90, u kthye në një revolucion për mjekësinë pediatrike. Dy mjekë britanikë u frymëzuan nga pit-stop-et e Formula 1 për të përmirësuar trajtimin e foshnjave në gjendje kritike dhe për të reduktuar gabimet gjatë transferimit të tyre në terapi intensive.

Mjekët Martin Elliott dhe Allan Goldman, nga spitali “Great Ormond Street” në Londër, përballeshin vazhdimisht me vështirësi gjatë transportimit të foshnjave nga salla e operacionit drejt njësisë së kujdesit intensiv. Problemi kryesor ishte mungesa e koordinimit mes ekipeve mjekësore dhe pajisjeve të mbështetjes jetike.

Duke parë saktësinë dhe shpejtësinë e ekipeve të Formula 1 gjatë ndalesave në bokse, ata vendosën të marrin shembull nga mënyra e punës së mekanikëve të Scuderia Ferrari. Mjekët kontaktuan ekipin italian dhe u ftuan në Maranello për të parë nga afër procesin e koordinimit gjatë garave.

Inxhinierët dhe mekanikët e Ferrarit identifikuan menjëherë problemet në procedurat spitalore: shumë persona që vepronin njëkohësisht, mungesë komunikimi të qartë dhe mungesë koordinimi.

Pas bashkëpunimit, u krijua një sistem i ri pune ku çdo mjek kishte rol të përcaktuar, pozicion fiks dhe komunikim të shkurtër e të drejtpërdrejtë. Rezultatet ishin të menjëhershme. Gabimet gjatë transferimit të pacientëve ranë me 67%, ndërsa transporti drejt njësive intensive u bë më i shpejtë dhe më i sigurt.

Ky bashkëpunim u konsiderua një nga shembujt më të suksesshëm të përdorimit të teknologjisë dhe organizimit sportiv në shërbim të mjekësisë. Më pas, edhe skuadra të tjera të Formula 1, si Williams dhe McLaren, bashkëpunuan me spitale dhe qendra shëndetësore për projekte të ngjashme.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)